வீட்டு வாடகை ஒப்பந்தங்களில் வளர்ப்புப் பிராணிகளைத் தடைசெய்யும் விதிகள், தனிநபர் உரிமைகளை மீறுவதாக அமையுமா என்பது குறித்த முக்கிய வழக்கின் தீர்ப்பைக் கியூபெக் மேல்முறையீட்டு நீதிமன்றம் (Quebec Court of Appeal) தற்போது பரிசீலித்து வருகிறது.
கியூபெக் மாகாணத்தில் உள்ள வாடகை வீடுகளில் வளர்ப்புப் பிராணிகளை (Pets) வைத்திருக்க வாடகைதாரர்களுக்குச் சட்டப்பூர்வ உரிமை உள்ளதா என்பது குறித்து விசாரணை நடைபெற்று வருகிறது.
இதுதொடர்பான வாதப் பிரதிவாதங்களைக் கேட்டறிந்த நீதிமன்றம், தற்போது தனது தீர்ப்பிற்காக ஆவணங்களை ஆராய்ந்து வருவதாகத் தகவல்கள் வெளியாகியுள்ளன.
கடந்த மார்ச் மாதம், கியூபெக் வீட்டுவசதி தீர்ப்பாயத்தின் நீதிபதி சுசான் கியூவ்ரெமாண்ட் (Suzanne Guèvremont) வழங்கிய தீர்ப்பின் அடிப்படையிலேயே இந்த மேல்முறையீட்டு வழக்கு தொடரப்பட்டுள்ளது.
வாடகை ஒப்பந்தங்களில் வளர்ப்புப் பிராணிகளைத் தடை செய்யும் உட்பிரிவுகள், கியூபெக் உரிமைகள் மற்றும் சுதந்திரங்களின் பட்டயத்தின் (Quebec Charter of Human Rights and Freedoms) கீழ் தனிநபர் சுதந்திரம் மற்றும் தனியுரிமைக்கான உரிமைகளை மீறுவதாக அமைகிறது என அந்தத் தீர்ப்பில் குறிப்பிடப்பட்டிருந்தது.
மேலும், மனிதர்களுக்கும் அவர்களது வளர்ப்புப் பிராணிகளுக்கும் இடையிலான பிணைப்பை ஏற்கும் வகையில் தற்கால விலங்குப் பாதுகாப்புச் சட்டங்கள் வளர்ச்சியடைந்து வருவதால், நீதிமன்றத்தின் சட்ட நடைமுறைகளும் அதற்கேற்ப மாற வேண்டும் என நீதிபதி சுட்டிக்காட்டியிருந்தமை குறிப்பிடத்தக்கது.
