கியூபெக் (Quebec) மாகாணத்தில் அண்மையில் நடைபெற்ற தேர்தலில் வெற்றிபெற்ற பார்ட்டி கியூபெக்வா கட்சியின் (Parti Québécois – PQ) புதிதாகத் தேர்ந்தெடுக்கப்பட்ட சட்டமன்ற உறுப்பினர்கள் இம்மாதம் 15ஆம் திகதி பதவியேற்கவுள்ளனர்.
பிரித்தானிய மன்னருக்கு விசுவாசப் பிரமாணம் செய்வதிலிருந்து விலக்களிக்கும் மாகாணச் சட்டத்திற்கு எதிராக நீதிமன்றத்தில் வழக்கு நிலுவையில் உள்ள சூழலிலேயே, இந்தச் சத்தியப் பிரமாண நிகழ்வு நடைபெறவுள்ளது.
கியூபெக் கட்சியின் புதிய அமைச்சரவை இம்மாதம் 21ஆம் திகதி உத்தியோகபூர்வமாக அறிமுகப்படுத்தப்படவுள்ளது.
முன்னதாக 2022ஆம் ஆண்டு அறிவித்தது போலவே, பிரித்தானிய மன்னருக்கு விசுவாசமாக சத்தியப் பிரமாணம் செய்யப் போவதில்லை என்பதில், கியூபெக் கட்சியின் தலைவர் பால் சென்-பியர் பிலாம்பொண்டன் (Paul St-Pierre Plamondon) உறுதியாக உள்ளார்.
1867ஆம் ஆண்டு இயற்றப்பட்ட அரசியலமைப்புச் சட்டத்தின்படி, கியூபெக் மாகாணச் சபை உறுப்பினர்கள் (MNAs) பிரித்தானிய மன்னருக்கு விசுவாசப் பிரமாணம் செய்வது கட்டாயமாக்கப்பட்டிருந்தது.
எனினும், கடந்த 2022ஆம் ஆண்டு டிசம்பர் மாதம் கியூபெக் மாகாண அரசு ’Bill 4’ எனப்படும் மசோதாவை ஏகமனதாக நிறைவேற்றியது.
இதன் மூலம், பிரித்தானிய மன்னருக்கான விசுவாச சத்தியப் பிரமாணம் மாகாணச் சட்டமியற்றுபவர்களுக்குப் பொருந்தாது என்ற விதி சேர்க்கப்பட்டது.
எனினும், 2022ஆம் ஆண்டின் இந்தச் சட்டத்திற்கு எதிராக, சட்டப் பேராசிரியரான லாரன்ஸ் டேவிட் (Lawrence David) உள்ளிட்ட தரப்பினரால் நீதிமன்றத்தில் வழக்குத் தொடரப்பட்டுள்ளது.
கியூபெக் சட்டமன்றத்தில் புதிதாக உறுப்புரிமை பெற உள்ளவர்கள், பிரித்தானிய மன்னருக்குச் சத்தியம் செய்வதைக் கட்டாயமாக்கும் வகையில் அவசரத் தடை உத்தரவு கோரிய மனு ஒன்றும் தாக்கல் செய்யப்பட்டுள்ளது.
இந்த வழக்கு விசாரணை இம்மாதம் 19 ஆம் திகதி முதல் நவம்பர் மாதம் 9ஆம் திகதிக்குள் நடைபெறும் என எதிர்பார்க்கப்படுகிறது.
