மொண்ட்ரியல் நகரில் உள்ள சுரங்க ரயிலில் (Montreal Metro), பாரம்பரிய உடை அணிந்திருந்த 9 வயது பூர்வகுடிச் சிறுவன் ஒருவன் மீது பெண் ஒருவர் இனவெறித் தாக்குதல் நடத்திய சம்பவம் தொடர்பில் விசாரணைகள் தற்போது ஆரம்பிக்கப்பட்டுள்ளன.
“உண்மை மற்றும் நல்லிணக்கத்திற்கான தேசிய தினம்” கடைப்பிடிக்கப்பட்ட நாள் அன்று மொண்ட்ரியல் நகரில் இச்சம்பவம் இடம்பெற்றுள்ளது.
கான்வாக்கே (Kahnawà:ke) பகுதியைச் சேர்ந்த மோஹாக் (Mohawk) பழங்குடியினக் குடும்பத்தைச் சேர்ந்த டெகாஹ்னேகேக் ஸ்டேசி (Tekahné:kake Stacey), தனது தாய், 9 வயது மருமகன் மற்றும் அவனது நண்பருடன் மொண்ட்ரியல் சிறுவர் மருத்துவமனையில் நடைபெற்ற நிகழ்வொன்றில் பங்கேற்றுவிட்டு வீடு திரும்பியபோதே, இத்தாக்குதலுக்கு உள்ளாகியுள்ளனர்.
ரயிலில் ஏறியதும், அங்கிருந்த பெண் ஒருவர் பூர்வகுடியினரின் போர் முழக்கங்களை கேலி செய்யும் வகையில் சத்தமிட்டுள்ளார்.
பின்னர் சிறுவனைப் பார்த்து அருவருப்பான வார்த்தைகளைப் பேசி, இனரீதியாக அவமதித்துள்ளார்.
பாரம்பரிய உடையில் இருந்த சிறுவனைக் கண்டு அப்பெண் கடும் வெறுப்பை வெளிப்படுத்தியதாக ஸ்டேசி தெரிவித்துள்ளார்.
இச்சம்பவத்தை ஸ்டேசி தனது கைபேசியில் காணொளியாகப் பதிவு செய்துள்ள நிலையில், அதில் அப்பெண் தொடர்ந்து கேலி செய்வதோடு, கேமராவை நோக்கி விரலை நீட்டி அச்சுறுத்துவதும் பதிவாகியுள்ளது.
தனது பழங்குடியின அடையாளத்தைக் குறித்து எப்போதும் பெருமிதம் கொள்ளும் தன் மருமகன், இந்தச் சம்பவத்தினால் பெரிதும் மனமுடைந்து போயுள்ளதாகக் கூறிய ஸ்டேசி, இச்சம்பவம் தொடர்பாகச் சட்ட நடவடிக்கை எதையும் எடுக்கப்போவதில்லை எனக் குறிப்பிட்டுள்ளார்.
