போர்ன்ஹப் இணையத்தளம் மீது விசாரணையை ஆரம்பித்துள்ள ஒஃப்கோம் ஆணையம்

ஆபாச இணையத்தளமான ‘போர்ன்ஹப்’ (Pornhub), சிறுவர்கள் தனது தளத்தைப் பார்வையிடுவதைத் தடுப்பதற்கான தகுந்த வயதுக் கட்டுப்பாட்டு நடவடிக்கைகளை மேற்கொள்ளத் தவறியுள்ளதா என்பது குறித்து, பிரித்தானியக் தொடர்பாடல் ஒழுங்குமுறை ஆணையமான ‘ஒஃப்கோம்‘ (Ofcom) உத்தியோகபூர்வ விசாரணையைத் தொடங்கியுள்ளது.

மொண்ட்ரியாலின் கோட்-டெஸ்-நெய்கேஸ் (Côte-des-Neiges) பகுதியைத் தலைமையகமாகக் கொண்டு இயங்கும் போர்ன்ஹப் தளத்தின் தாய் நிறுவனமான ‘அய்லோ‘ (Aylo) மீது இந்த விசாரணை ஆரம்பிக்கப்பட்டுள்ளது.

பிரித்தானியாவின் ‘இணையப் பாதுகாப்புச் சட்டத்தின்கீழ்‘ (Online Safety Act) வயதுக் கட்டுப்பாடுகளைச் சரியாக அமல்படுத்தாத தளங்களுக்கு எதிராக 18 மில்லியன் பவுண்டுகள் வரை அபராதம் விதிக்க முடியும் என்பது குறிப்பிடத்தக்கது.

பிரித்தானியாவில் அமல்படுத்தப்பட்ட கடுமையான இணையப் பாதுகாப்புச் சட்டங்களைத் தொடர்ந்து, போர்ன்ஹப் தளம் அந்நாட்டில் தற்காலிகமாக முடக்கப்பட்டிருந்தது.

எனினும், கடந்த மே மாதம் ஆப்பிள் (Apple) சாதனங்களில் உள்ள ‘சாதன மட்டத்திலான வயது உறுதிப்படுத்தல்’ (Device-level age verification) தொழில்நுட்பத்தைப் பயன்படுத்தி, 18 வயதிற்கு மேற்பட்ட பயனர்களுக்கு மட்டும் தனது போர்ன்ஹப் சேவையை மீள வழங்குவதற்கு, அய்லோ நடவடிக்கை எடுத்தது.

இருப்பினும், இந்த புதிய முறையை அமல்படுத்துவதற்கு முன்னர் அய்லோ நிறுவனம் உரிய பரிசோதனைகளையோ அல்லது போதிய ஆய்வுகளையோ (Due diligence) மேற்கொள்ளவில்லை என்று, பிரித்தானியக் தொடர்பாடல் ஒழுங்குமுறை ஆணையமான ஒஃப்கோம் குற்றம் சாட்டியுள்ளது.

இதன் காரணமாக, சிறுவர்கள் இன்னமும் இந்த ஆபாச உள்ளடக்கங்களை அணுகும் அபாயம் நிலவுவதாக ஒழுங்குமுறை ஆணையம் கவலை வெளியிட்டுள்ளது.