முன்னாள் ஹொலிவுட் தயாரிப்பாளர் ஹார்வி வெயின்ஸ்டீனுக்கு பாலியல் தாக்குதல் வழக்கில் நியூயோர்க் நீதிமன்றம் புதன்கிழமை 15 ஆண்டுகள் சிறைத்தண்டனை விதித்து தீர்ப்பளித்துள்ளது.
2006 ஆம் ஆண்டு தனது தயாரிப்பு உதவியாளராக இருந்த மிரியம் ஹேலி (Miriam Haley) மீது தனது மன்ஹாட்டன் வீட்டில் வைத்து பாலியல் தாக்குதல் நடத்தியதற்காக, 74 வயதான வெயின்ஸ்டீன் மீது கடந்த ஆண்டு நடத்தப்பட்ட மறுவிசாரணையில் குற்றச்சாட்டு நிரூபிக்கப்பட்டது.
முன்னதாக 2020ஆம் ஆண்டு இவருக்கு விதிக்கப்பட்ட 23 ஆண்டுகள் சிறைத்தண்டனையை, நியூயோர்க் நீதிமன்றம் 2024 இல் ரத்து செய்து, அவருக்கு நியாயமான விசாரணை கிடைக்கவில்லை எனத் தெரிவித்தது.
இதனைத் தொடர்ந்து 2025 ஜூன் மாதம் நடைபெற்ற மறுவிசாரணையில், மிரியம் ஹேலி தொடர்பான குற்றச்சாட்டில் அவர் குற்றவாளியாகக் காணப்பட்டார்.
அதேவேளை, முன்னாள் மொடலான காஜா சொகோலா (Kaja Sokola) மீதான தாக்குதல் குற்றச்சாட்டிலிருந்து அவர் விடுவிக்கப்பட்டார்.
ஜெசிகா மேன் (Jessica Mann) தொடர்பான பாலியல் குற்றச்சாட்டில் நடுவர் மன்றம் ஒருமித்த முடிவை எட்டாத நிலையில், மே மாதம் இடம்பெற்ற மூன்றாவது விசாரணையும் முடிவின்றி முடிவடைந்தது.
தொடர்ந்து நான்காவது விசாரணையில் சாட்சியமளிக்க மேன் மறுத்ததைத் தொடர்ந்து, அடுத்த மாதத்தில் அக்குற்றச்சாட்டை அரச வழக்கறிஞர்கள் கைவிட்டனர்.
மன்ஹாட்டன் மாவட்ட வழக்கறிஞர் அல்வின் பிராக் (Alvin Bragg), மிரியம் ஹேலியின் சாட்சியத்தைப் பாராட்டியதுடன், அவரது துணிச்சலைப் போற்றினார்.
இருப்பினும், வெயின்ஸ்டீன் தான் எவ்வித பாலியல் அத்துமீறல்களிலும் ஈடுபடவில்லை எனக் கூறி குற்றச்சாட்டுகளை மறுத்துள்ளார்.
நீதிபதி கர்டிஸ் ஃபார்பர் (Curtis Farber) அளித்த இந்தத் தீர்ப்பை எதிர்த்து வெயின்ஸ்டீனின் பேச்சாளர் அறிக்கை ஒன்றை வெளியிட்டுள்ளார்.
மிராமேக்ஸ் (Miramax) நிறுவனத்தின் இணை நிறுவனரான வெயின்ஸ்டீனுக்கு, 2022 ஆம் ஆண்டு கலிபோர்னியாவில் நடந்த பாலியல் குற்ற வழக்கில் 16 ஆண்டுகள் சிறைத்தண்டனை விதிக்கப்பட்டது.
அந்தத் தண்டனையை கலிபோர்னியா மேல்முறையீட்டு நீதிமன்றம் உறுதிசெய்த போதிலும், அவருக்கு மீண்டும் தண்டனை விவரம் மறுஆய்வு செய்யப்பட வேண்டும் என உத்தரவிட்டுள்ளது.
பிரபல நடிகைகள் உட்பட 100 க்கும் மேற்பட்ட பெண்கள் வெயின்ஸ்டீன் மீது குற்றச்சாட்டுகளை முன்வைத்துள்ளமை குறிப்பிடத்தக்கது.
