ரஷ்யாவின் புதிய அச்சுறுத்தல்கள் மற்றும் சர்வதேச பாதுகாப்பின்மை அதிகரித்து வரும் சூழலில், ஆர்க்டிக் பிராந்தியத்தின் பாதுகாப்பு மற்றும் பொருளாதார உறவுகளை பலப்படுத்தும் நோக்கில் நோர்வேயுடன் பாதுகாப்பு ஒத்துழைப்பை தீவிரப்படுத்துவதற்கு கனேடிய மத்திய அரசு தீர்மானித்துள்ளது.
பிரதமர் மார்க் கார்னி (Mark Carney) மற்றும் ஒட்டாவாவிற்கு விஜயம் மேற்கொண்டுள்ள நோர்வே பிரதமர் யோனாஸ் கார் ஸ்டோரே (Jonas Gahr
Støre) ஆகியோருக்கு இடையிலான உயர் மட்ட சந்திப்பின் போது இத் தீர்மானம் எட்டப்பட்டுள்ளது.
நோர்வேயின் பாரிய அரசுசார் இறையாண்மை நிதியத்திலிருந்து (sovereign wealth fund) கனடாவில் முதலீடுகளை ஈர்ப்பதுடனும், பசுமை சக்தி (green energy), முக்கியமான கனிமங்கள் (critical minerals) மற்றும் விண்வெளித் தொழில்நுட்பத் துறைகளில் இருதரப்பு ஒத்துழைப்பை விரிவுபடுத்தவும் இச்சந்திப்பில் இணக்கம் காணப்பட்டது.
ஒட்டாவாவில் நடைபெற்ற கூட்டுச் செய்தியாளர் சந்திப்பில் உரையாற்றிய பிரதமர் மார்க் கார்னி, ஆர்க்டிக் நாடுகளுக்கு இடையிலான
ஒருங்கிணைப்பை மேம்படுத்துவது ரஷ்யாவின் அச்சுறுத்தல்களுக்கு பதிலடி கொடுக்க அவசியமானது என சுட்டிக்காட்டினார்.
குறிப்பாக, உளவுத்துறை தகவல்களைப் பரிமாறிக்கொள்வது, ஆர்க்டிக் பிராந்தியக் கண்காணிப்பு, விண்வெளி மற்றும் நீருக்கடியிலான
தொழில்நுட்பத் திறன்களை கூட்டாக மேம்படுத்துவது ஆகிய துறைகளில் இரு நாடுகளும் இணைந்து செயல்படவுள்ளன. கனடா தனது கடற்படைக்காக 12 புதிய நீர்மூழ்கிக் கப்பல்களை கொள்முதல் செய்யும் திட்டத்தில் ஜெர்மனி மற்றும் நோர்வேயின் கூட்டுப்பங்களிப்புடன்
கூடிய நிறுவனத்தை தேர்வு செய்துள்ளமை குறிப்பிடத்தக்கது.
உக்ரைனுக்கு ஆதரவளிக்கும் ஐரோப்பிய நாடுகள் மீது ரஷ்யா தாக்குதல்களை நடத்தக்கூடும் என போலந்து பிரதமர் விடுத்த எச்சரிக்கை
குறித்து, கனேடிய ஊடகவியலாளர்கள் கேள்வியெழுப்பினர். இதற்கு பதிலளித்த நோர்வே பிரதமர் ஸ்டோரே, நோர்வே உளவுத்துறை
அறிக்கைகளின்படி சதிவேலைகள் (sabotage) உட்பட ஹைபிரிட் (hybrid) தாக்குதல்களுக்கான உண்மையான அச்சுறுத்தல்கள் நிலவுவதாக
உறுதிப்படுத்தினார்.
இதேவேளை, இந்த எச்சரிக்கையை தாம் தீவிரமாக எடுத்துக்கொள்வதாக பிரதமர் மார்க் கார்னி தெரிவித்தமை சுட்டிக்காட்டத் தக்கது.
