22ஆவது திருத்தம் தொடர்பில் உயர் நீதிமன்றத்தின் முக்கிய அறிவிப்பு!

இலங்கை அரசியலமைப்பின் 22ஆவது திருத்தச் சட்டமூலம் தொடர்பில் முக்கிய அறிவிப்பொன்று இன்று நாடாளுமன்றத்தில் வெளியிடப்பட்டுள்ளது.

22ஆவது அரசியலமைப்புத் திருத்தச் சட்டமூலத்தின் எந்தவொரு உறுப்புரையும் அரசியலமைப்புக்கு முரணானதாக இல்லை என உயர் நீதிமன்றம் தீர்மானித்துள்ளதாக சபாநாயகர் டாக்டர் ஜகத் விக்கிரமரத்ன இன்று நாடாளுமன்றத்தில் அறிவித்துள்ளார்.

அத்துடன், இந்த சட்டமூலத்தை நிறைவேற்றுவதற்கு பொதுமக்களின் அங்கீகாரத்தைப் பெறும் வகையில் சர்வஜன வாக்கெடுப்பு நடத்த வேண்டிய அவசியம் இல்லை எனவும் உயர் நீதிமன்றம் தீர்மானித்துள்ளது.

எனினும், 22ஆவது திருத்தச் சட்டமூலத்தை நாடாளுமன்றத்தில் நிறைவேற்றுவதற்கு அரசியலமைப்பில் குறிப்பிடப்பட்டுள்ள சிறப்புப் பெரும்பான்மை அவசியமாகும் என தெரிவிக்கப்பட்டுள்ளது.

இந்த சட்டமூலம் தொடர்பில் அரசியலமைப்பின் 121ஆவது உறுப்புரையின் கீழ் பல மனுக்கள் உயர் நீதிமன்றத்தில் தாக்கல் செய்யப்பட்டிருந்தன.

மொத்தமாக 67 மனுக்கள் தாக்கல் செய்யப்பட்ட நிலையில், ஐந்து நீதியரசர்களைக் கொண்ட உயர் நீதிமன்ற அமர்வு இந்த மனுக்களை விசாரணைக்கு எடுத்திருந்தது.

பிரதம நீதியரசர் ப்ரீத்தி பத்மன் சூரசேன தலைமையில், நீதியரசர்களான அச்சல வெங்கப்புலி, அர்ஜுன ஒபேசேகர, சம்பத் அபேகூன் மற்றும் கிஹான் குலதுங்க ஆகியோர் அடங்கிய அமர்வு இந்த விசாரணையை முன்னெடுத்திருந்தது.

விசாரணைகள் செப்டம்பர் 2ஆம் திகதி நிறைவடைந்த நிலையில், சட்டமூலத்தின் அரசியலமைப்புத் தன்மை தொடர்பான நீதிமன்றத் தீர்மானம் சபாநாயகருக்கு அனுப்பி வைக்கப்பட்டது.

இதனிடையே, 22ஆவது திருத்தச் சட்டமூலத்தின் இரண்டாவது வாசிப்பு மீதான நாடாளுமன்ற விவாதம் எதிர்வரும் செப்டம்பர் 24 மற்றும் 25ஆம் திகதிகளில் நடைபெறவுள்ளது.

நாடாளுமன்றத்தின் தற்போதைய நிகழ்ச்சி நிரலின்படி, செப்டம்பர் 24ஆம் திகதி காலை 11.30 மணி முதல் மாலை 7 மணி வரையும், செப்டம்பர் 25ஆம் திகதி காலை 11.30 மணி முதல் மாலை 7 மணி வரையும் இந்த சட்டமூலம் தொடர்பான விவாதம் இடம்பெறவுள்ளது.

மேலும், 22ஆவது திருத்தச் சட்டமூலத்தின் இரண்டாவது உறுப்புரையில் சில மாற்றங்களை மேற்கொள்ளுமாறும் உயர் நீதிமன்றம் அறிவுறுத்தியுள்ளது.

67 வயதை அடையும் நாள் தொடர்பாக சட்டமூலத்தில் இடம்பெற்றுள்ள ஒரு சொற்றொடரை மாற்ற வேண்டும் என நீதிமன்றம் தீர்மானித்துள்ளது.

அத்துடன், சட்டம் அமுலுக்கு வரும் நாளில் பிரதம நீதியரசர் பதவியில் இருக்கும் நபருக்கு, சட்டமூலத்தில் குறிப்பிடப்படும் ஆறு வருட பதவிக்கால வரம்பு பொருந்தாது என்ற புதிய விதியையும் சேர்க்குமாறு நீதிமன்றம் அறிவுறுத்தியுள்ளது.

இதேவேளை, நீதித்துறை தொடர்பான மற்றுமொரு சட்டமூலமான Judicature Amendment Bill தொடர்பாகவும் உயர் நீதிமன்றம் தனது தீர்மானத்தை அறிவித்துள்ளது.

அந்த சட்டமூலத்தின் எந்தவொரு ஏற்பாடும் அரசியலமைப்புக்கு முரணானதல்ல என்றும், அதனை நாடாளுமன்றத்தில் எளிய பெரும்பான்மையுடன் நிறைவேற்ற முடியும் என்றும் உயர் நீதிமன்றம் தீர்மானித்துள்ளதாக சபாநாயகர் அறிவித்துள்ளார்.

இதனால், 22ஆவது அரசியலமைப்புத் திருத்தச் சட்டமூலம் தொடர்பான அடுத்த கட்ட நடவடிக்கைகள் தற்போது நாடாளுமன்றத்தை மையமாகக் கொண்டுள்ளன.

எதிர்வரும் 24 மற்றும் 25ஆம் திகதிகளில் நடைபெறவுள்ள விவாதத்துக்குப் பின்னர், சட்டமூலம் நாடாளுமன்றத்தில் அடுத்தகட்ட வாக்கெடுப்பு நடவடிக்கைகளை எதிர்கொள்ளவுள்ளது.