கனடாவுடனான வர்த்தகப் போரில் அமெரிக்க அதிபர் டொனால்ட் டிரம்பின் நடவடிக்கைகளுக்கு அமெரிக்கக் காங்கிரஸின் ஆளும் குடியரசுக்கட்சி (GOP) உறுப்பினர்கள் பகிரங்கமாக ஆதரவு தெரிவித்துள்ளனர்.
அத்துடன், இருநாடுகளுக்கும் இடையிலான வர்த்தகப் பேச்சுவார்த்தைகள் முறிவடைந்ததற்குப் பிரதமர் மார்க் கார்னி தலைமையிலான கனடிய அரசாங்கமே காரணம் என்றும் அவர்கள் குற்றம் சாட்டியுள்ளனர்.
அமெரிக்க வர்த்தகப் பிரதிநிதி ஜேமிசன் கிரீருடன் (Jamieson Greer) வொஷிங்டனில் உள்ள கேபிட்டல் ஹில்லில் நடைபெற்ற மூடிய கதவுகளுக்கு பின்னாலான சந்திப்பைத் தொடர்ந்து, அமெரிக்கக் காங்கிரஸின் ஆளும் குடியரசுக்கட்சி (GOP) உறுப்பினர்கள் இக்கருத்துக்களை வெளியிட்டுள்ளனர்.
வர்த்தகப் பேச்சுவார்த்தையிலிருந்து கனடா விலகிக்கொண்டதாகக் குறிப்பிட்ட அவர்கள், அதிபர் டிரம்பின் வர்த்தக உத்திகளுக்குத் தங்களின் முழுமையான ஆதரவை வெளிப்படுத்தியுள்ளனர்.
அதிபர் டிரம்பின் வரிக் கொள்கைகளுக்கு அமெரிக்கப் பொதுமக்களிடையே எதிர்ப்பு நிலவுவதாகக் கருத்துக்கணிப்புகள் சுட்டிக்காட்டிய போதிலும், குடியரசுக்கட்சி உறுப்பினர்கள் டிரம்பின் நிலைப்பாட்டைத் தொடர்ந்து ஆதரித்து வருகின்றமை சுட்டிக்காட்டத் தக்கது.
