பிரபல ஹாலிவுட் தொலைக்காட்சித் தொடரான ‘ஹீரோஸ்’ (Heroes) மற்றும் ‘நாஷ்வில்’ (Nashville) ஆகியவற்றில் நடித்து உலகளவில் நீங்காத இடம்பெற்ற முன்னணி நடிகை ஹெய்டன் பனெட்டியர் (Hayden Panettiere) தனது 36-வது வயதில் தெற்கு கரோலினாவில் திடீரென காலமானார்.
ஆகஸ்ட் 16 அன்று அவரது இல்லத்தில் சுயநினைவற்ற நிலையில் கண்டெடுக்கப்பட்ட அவரைப் பரிசோதித்த மருத்துவக் குழுவினர் மாரடைப்பு காரணமாக அவர் உயிரிழந்ததாகத் தெரிவித்தனர். அவரது மறைவை அவரது குடும்பத்தினரும் செய்தித் தொடர்பாளரும் அதிகாரப்பூர்வமாக உறுதிப்படுத்தியுள்ளனர்.
குழந்தை நட்சத்திரமாகத் தன் கலைப்பயணத்தைத் தொடங்கிய ஹெய்டன், ‘ஹீரோஸ்’ தொடரில் சூப்பர் பவர் கொண்ட கிளேர் பென்னட் என்ற கதாபாத்திரத்தின் மூலம் சர்வதேச புகழ்பெற்றார்.
பின்னர் ‘நாஷ்வில்’ தொடரில் பாடகி ஜூலியட் பார்னஸாக நடித்ததற்காக இருமுறை கோல்டன் குளோப் விருதுப் பரிந்துரைகளைப் பெற்றார்.
மேலும், பிரபல ‘ஸ்க்ரீம்’ (Scream) திரைப்படத் தொடர்கள், ‘ரிமம்பர் தி டைட்டன்ஸ்’ மற்றும் ‘ஐஸ் பிரின்சஸ்’ உள்ளிட்ட பல வெற்றிப் படங்களில் நடித்து கோடிக்கணக்கான ரசிகர்களின் மனதை வென்றார்.
திரைவாழ்வில் உச்சத்தில் இருந்தபோதிலும், அவரது தனிப்பட்ட வாழ்க்கை பல்வேறு சவால்களும் போராட்டங்களும் நிறைந்ததாக இருந்தது.
மகளின் பிறப்புக்குப் பிறகு பிரசவத்திற்குப் பிந்தைய மன அழுத்தம் (Postpartum Depression) மற்றும் போதைப்பொருள் பழக்கத்தால் கடுமையாகப் பாதிக்கப்பட்ட அவர், அதிலிருந்து மீண்டு வரத் தொடர் சிகிச்சைகளை எடுத்துக்கொண்டார்.
தனது வாழ்க்கைப் போராட்டங்கள், மனநல மீட்பு மற்றும் தம்பி ஜான்சன் பனெட்டியரின் மறைவு குறித்த அனுபவங்களை ‘திஸ் இஸ் மீ: ஏ ரெக்கனிங்’ என்ற சுயசரிதை நூலாகவும் எழுதி வெளியிட்டிருந்தார்.
அவரது திடீர் மறைவு செய்தி வெளியானது முதல் ஹாலிவுட் பிரபலங்களும் உலகெங்கிலும் உள்ள ரசிகர்களும் சோகத்தில் ஆழ்ந்து தங்கள் இரங்கல்களைத் தெரிவித்து வருகின்றனர்.
