தமிழ் திரையுலகில் முன்னணி இயக்குநர்களில் ஒருவரான ராம் இயக்கத்தில், பிரபல மலையாள நடிகர் நிவின் பாலி, நடிகை அஞ்சலி மற்றும் நகைச்சுவை நடிகர் சூரி ஆகியோர் முக்கியக் கதாபாத்திரங்களில் இணைந்து நடித்துள்ள திரைப்படம் ‘ஏழு கடல் ஏழு மலை’.
இப்படத்திற்கான எதிர்பார்ப்பு ரசிகர்கள் மத்தியில் ஏற்கனவே அதிகமாக இருந்து வரும் நிலையில், தற்போது திரையுலகினரையும் இசைப் பிரியர்களையும் கவரும் வகையில் இப்படத்தின் மூன்றாவது பாடலான ‘நமக்காய் ஒரு வானம்’ உத்தியோகபூர்வமாக வெளியிடப்பட்டுள்ளது.
இசையமைப்பாளர் யுவன் சங்கர் ராஜா இசையமைத்துள்ள இப்பாடலை, பிரபல பாடகியும் நடிகையுமான ஆண்ட்ரியா ஜெரெமையாவுடன் இணைந்து அவரே பாடியுள்ளார். காதலின் ஆழத்தையும் அதன் அழகையும் நேர்த்தியாக வெளிப்படுத்தும் வகையில் உருவாகியுள்ள இப்பாடல், வெளியான குறுகிய நேரத்திலேயே சமூக வலைதளங்களில் வைரலாகி ரசிகர்களின் மனதை வென்று வருகிறது.
இயக்குநர் ராம் மற்றும் யுவன் சங்கர் ராஜாவின் கூட்டணி ஏற்கனவே பல சூப்பர் ஹிட் பாடல்களைக் கொடுத்துள்ளதால், இந்த ‘நமக்காய் ஒரு வானம்’ பாடலும் ரசிகர்கள் மத்தியில் பெரும் வரவேற்பைப் பெற்று வருகிறது.
