‘ஷம்பாலா’ என்ற தெலுங்கு திரைப்படத்தின் மூலம் தனித்துவமான கற்பனை உலகை அறிமுகப்படுத்திய இயக்குநர் யுகேந்தர் முனி, தற்போது ‘கரிகாலா’ என்ற பிரம்மாண்ட பான் இந்தியா சோஷியோ ஃபேண்டஸி திரைப்படத்தை இயக்கி வருகிறார். ஷைனிங் பிக்சர்ஸ் சார்பில் மகிதர் ரெட்டி மற்றும் ராஜசேகர் அன்னபிமோஜு இணைந்து தயாரிக்கும் இப்படத்தில் நடிகர் சந்தீப் கிஷன் கதாநாயகனாக நடிக்கிறார். படத்தின் கான்செப்ட் போஸ்டர் ஏற்கனவே நல்ல வரவேற்பைப் பெற்ற நிலையில், தற்போது படத்தின் தலைப்பும் மிரட்டலான ஃபர்ஸ்ட் லுக் போஸ்டரும் அதிகாரப்பூர்வமாக வெளியிடப்பட்டுள்ளன.
வெளியாகியுள்ள ஃபர்ஸ்ட் லுக் போஸ்டரில் அடர்ந்த மர்மமான காட்டில், கையில் வாளை ஏந்தியபடி குதிரையில் கம்பீரமாகச் சீறிப்பாயும் சந்தீப் கிஷனுடன், அருகில் கர்ஜித்தபடி ஓடிவரும் சிங்கத்தின் காட்சியமைப்பு ரசிகர்களைப் பெரும் வியப்பில் ஆழ்த்தியுள்ளது. இந்திய நாட்டுப்புறக் கதைகள், அம்புலிமாமா கதைகளின் மாய உலகம் மற்றும் புராண மரபுகளை நவீன தொழில்நுட்பத்துடன் இணைத்து இந்தப் படம் உருவாக்கப்பட்டு வருகிறது. தெலுங்கு, தமிழ் மற்றும் இந்தி ஆகிய மொழிகளில் ஒரே நேரத்தில் உருவாகும் இப்படத்திற்காக சந்தீப் கிஷன் பிரத்யேக உடை மற்றும் புதிய தோற்றத்துடன் சக்திவாய்ந்த போர்வீரராக உருவெடுத்துள்ளார்.
‘கரிகாலா’ திரைப்படம் இரண்டு அத்தியாயங்களாக வெளியாகவுள்ளது. இதன்படி படத்தின் முதல் அத்தியாயம் 2027-ஆம் ஆண்டு ஜூலை 2-ஆம் தேதியும், இரண்டாம் அத்தியாயம் 2027-ஆம் ஆண்டு அக்டோபர் 28-ஆம் தேதியும் உலகமெங்கும் திரையரங்குகளில் வெளியாகவுள்ளன. இப்படத்தின் மற்ற நடிகர்கள் மற்றும் தொழில்நுட்பக் கலைஞர்கள் குறித்த அதிகாரப்பூர்வ அறிவிப்புகள் விரைவில் வெளியாகும் என எதிர்பார்க்கப்படுகிறது.
