கனடா, அமெரிக்கா மற்றும் மெக்ஸிகோ ஆகிய நாடுகளுக்கு இடையிலான வட அமெரிக்க வர்த்தக ஒப்பந்தமான கஸ்மா (CUSMA) தொடர்பில் தனக்கு எந்தக் கவலையுமில்லை என அமெரிக்க அதிபர் டொனால்ட் ட்ரம்ப் தெரிவித்துள்ளார்.
இருதரப்பு வர்த்தகப் பேச்சுவார்த்தைகளுக்காகக் கனடிய வர்த்தக அமைச்சர் டொமினிக் லெப்லாங்க் (Dominic LeBlanc) வாஷிங்டன் சென்றுள்ள நிலையில் ட்ரம்ப்பின் இந்த அறிக்கை வெளியாகியுள்ளது.
CUSMA ஒப்பந்தத்தைப் புதுப்பிக்கவோ அல்லது திருத்தவோ தான் விரும்பவில்லை எனக் குறிப்பிட்ட ட்ரம்ப், ” மெக்ஸிகோவுக்கும்
கனடாவுக்குமே அமெரிக்கா தேவையாக உள்ளது. அமெரிக்காவுக்கு அவர்கள் தேவைப்படவில்லை.” என்று கூறியுள்ளார்.
இந்த ஒப்பந்தம் அவர்களுக்குத் தான் முக்கியமே தவிர தமக்கு அல்ல என்று ட்ரம்ப் ஆணித்தரமாகத் தெரிவித்துள்ளார். ட்ரம்ப்பின் இந்த அதிரடி பேச்சுக்கு மத்தியிலும், கனடா-அமெரிக்க வர்த்தக அமைச்சர் டொமினிக் லெப்லாங்க் மற்றும் கனடாவின் தலைமை வர்த்தகப் பேச்சுவார்த்தையாளர் ஜேனிஸ் சாரெட் (Janice Charette) ஆகியோர் வாஷிங்டனில் அமெரிக்க அதிகாரிகளுடன் பேச்சுவார்த்தைகளை முன்னெடுத்து வருகின்றனர்.
CUSMA ஒப்பந்தத்தில் உள்ள சிக்கல்களைத் தீர்ப்பதுடன் மட்டுமல்லாமல், எஃகு (Steel), அலுமினியம், மரத்தொழில் மற்றும் வாகன உற்பத்தித் துறைகள் மீது விதிக்கப்பட்டுள்ள வரிகளை நீக்குவதையும் நோக்கமாகக் கொண்டு பேச்சுவார்த்தைகள் நடத்தப்பட்டு வருவதாக, பிரதமர் மார்க் கார்னி (Mark Carney) தெரிவித்திருந்தார்.
கனடியப் பொருட்களுக்கு அமெரிக்காவால் புதிதாக அறிவிக்கப்பட்டுள்ள 50 சதவீத வரியானது எதிர்வரும் ஓகஸ்ட் 19 ஆம் திகதி முதல் அமலுக்கு வரவுள்ள பின்னணியிலேயே, இந்த நெருக்கடியான பேச்சுவார்த்தைகள் நடைபெறுகின்றமை குறிப்பிடத்தக்கது.
