நாட்டில் கடந்த ஜூன் மாதத்திற்கான நுகர்வோர் விலைச்சுட்டெண் அடிப்படையிலான ஆண்டு பணவீக்க விகிதம், 2.8 சதவீதமாகக் குறைவடைந்துள்ளது.
கடந்த மே மாதத்தில் 3.2 சதவீதமாக உயர்ந்திருந்த பணவீக்கம், எரிபொருட்களின் விலையில் ஏற்பட்ட சரிவு காரணமாக ஜூன் மாதத்தில் வீழ்ச்சியடைந்துள்ளதாக, கனேடிய புள்ளியியல் திணைக்களம் (Statistics Canada) வெளியிட்ட அறிக்கையில் தெரிவிக்கப்பட்டுள்ளது.
சந்தைக் கணிப்புகளான 2.9 சதவீதத்தை விடவும் குறைவாகவே இந்தப் பணவீக்கப் பதிவு அமைந்துள்ளதோடு, மே மாதத்துடன் ஒப்பிடுகையில் ஜூன் மாதத்தில் ஒட்டுமொத்த நுகர்வோர் விலைக் குறியீடு 0.4 சதவீதம் சரிவைக் கண்டுள்ளது.
ஜூன் மாத பணவீக்கக் குறைவுக்கு நாட்டின் பெட்ரோல் நிலையங்களில் நிலவிய விலைச் சரிவே முதன்மை காரணியாக அமைந்தது எனக் கூறப்படுகின்றது.
இருப்பினும், நாட்டின் ஒட்டுமொத்த பணவீக்க விகிதத்தை விட மளிகைப் பொருட்களின் விலை உயர்வு ஆனது, தொடர்ச்சியாக 17 ஆவது மாதமாக அதிகளவில் பதிவாகி வருகின்றமை சுட்டிக்காட்டத்தக்கது.
