மொன்றியலின் வடக்குப் பகுதியில் (Montreal North) மசாஜ் மற்றும் உடற்பயிற்சி சிகிச்சை (Chiropractic care) அளிப்பதாகக் கூறி, வாடிக்கையாளர்களைப் பாலியல் ரீதியாகத் துன்புறுத்திய குற்றச்சாட்டில் 35 வயதுடைய நபர் ஒருவர் கைது செய்யப்பட்டுள்ளார்.
இவரால் பாதிக்கப்பட்டவர்கள் இன்னும் பலர் இருக்கலாம் எனச் சந்தேகிக்கும் மொன்றியல் பொலிஸார், அவர்களைத் தகுந்த ஆதாரங்களுடன் முன்வருமாறு கோரிக்கை விடுத்துள்ளனர்.
கைது செய்யப்பட்ட ஜார்ஜ் லூயிஸ் மரின் லொட்ஃபே (Jorge Luis Marin Lotfe), தனது வீட்டில் மசாஜ் சிகிச்சை அளிக்கப்படும் என, இணையதளம் மூலமாக விளம்பரம் செய்துள்ளார். இந்த விளம்பரத்தைப் பார்த்து சிகிச்சைக்காக வந்த இரண்டு நபர்களை அவர் பாலியல் ரீதியாகத் துன்புறுத்தியதாகப் பொலிஸார் தெரிவித்துள்ளனர்.
இந்தச் சம்பவங்கள் கடந்த 2024 ஆம் ஆண்டு ஜூலை மாதம் மற்றும் 2026 ஆம் ஆண்டு பிப்ரவரி மாதங்களில் இடம்பெற்றதாகக் கண்டறியப்பட்டுள்ளது. பொதுமக்கள் அவரைக் கண்டறிவதற்காக பொலிஸார் சில அடையாள விபரங்களை வெளியிட்டுள்ளனர்.
இந்த நபர் வேறு பெயர்களிலோ அல்லது வேறு இடங்களிலோ இவ்வாறான விளம்பரங்களைச் செய்து பலரை ஏமாற்றியிருக்கலாம் எனச் சந்தேகிக்கப்படுகிறது.
