கனடாவின் முன்னணி உணவு விநியோக நிறுவனமான குட்ஃபுட் நிறுவனத்தின் பாதுகாப்பு உரிமத்தைக் கனடிய உணவு ஆய்வு முகவரகம் (CFIA) தற்காலிகமாக ரத்து செய்துள்ளது.
மொன்றியலைத் தளமாகக் கொண்டு இயங்கும் இந்த நிறுவனத்தின் உரிமம், கடந்த டிசம்பர் மாதம் 30 ஆம் திகதி முதல் நடைமுறைக்கு வரும் வகையில், இடைநீக்கம் செய்யப்பட்டுள்ளது.
இந்த அதிரடி நடவடிக்கை காரணமாக, மொன்றியல் கிளையிலிருந்து உணவுகளைத் தயாரிப்பதற்கோ அல்லது பொதி செய்து மற்ற மாகாணங்களுக்கு அனுப்புவதற்கோ அந்நிறுவனத்திற்குத் தடை விதிக்கப்பட்டுள்ளது.
உணவுப் பாதுகாப்பு தொடர்பான "தடுப்பு கட்டுப்பாட்டு" (Preventive Controls) விதிகளை முறையாகப் பின்பற்றாததே இந்த நடவடிக்கைக்குக் காரணம் என கனடிய உணவு ஆய்வு முகவரகம் தெரிவித்துள்ளது.
கனடிய உணவுப் பாதுகாப்புச் சட்டத்தின் 4-வது பகுதியின் கீழ் வரும் நடைமுறைகளை குட்ஃபுட் நிறுவனம் சரியாகக் கையாளவில்லை என ஆய்வில் தெரியவந்துள்ளது.
அடுத்த 90 நாட்களுக்குள் இந்தக் குறைபாடுகளைச் சரிசெய்யாவிட்டால், நிறுவனத்தின் உரிமம் நிரந்தரமாக ரத்து செய்யப்படும் அபாயம் உள்ளது.
இந்த உரிம இடைநீக்கம் குறித்து விளக்கம் அளித்துள்ள குட்ஃபுட் நிறுவனம், தங்கள் உணவுகளின் பாதுகாப்பில் எந்தக் குறையும் இல்லை என்று தெரிவித்துள்ளது.
