நடிகை சமந்தா, இந்தித் திரைப்பட இயக்குநர் ராஜ் நிடிமோருவை காதலிப்பதாகக் கூறப்பட்டு வந்த நிலையில், சமீபத்தில் வெளியான புகைப்படம் ஒன்று இந்த செய்தியை உறுதிப்படுத்துவதுபோல் தெரியவந்துள்ளது,
நடிகர் நாக சைதன்யாவுடன் 2021 ஆம் ஆண்டில் விவாகரத்துப் பெற்ற சமந்தா, ராஜ் நிடிமோரு இயக்கிய ‘தி ஃபேமிலி மேன்’ மற்றும் ‘சிட்டாடெல்’ இணையத் தொடர்களில் நடித்தபோது இவர்களுக்கு இடையே நட்பு ஏற்பட்டு, அது நாளடைவில் காதலாக மாறியுள்ளதாகத் கூறப்படுகிறது.
இருவரும் பண்டிகைகளைக் கொண்டாடுவது மற்றும் ராஜ் நிடிமோருவின் குடும்பத்தினரைச் சமந்தா சந்திப்பது போன்ற புகைப்படங்கள் முன்னதாக வெளியாகி வந்தன.
இந்நிலையில், சமந்தா தனது புதிய வாசனைத் திரவியமான ‘சீக்ரெட் அல்கெமிஸ்ட்’ வெளியீட்டு விழாவின் படங்களை இன்ஸ்டாகிராமில் பகிர்ந்துள்ளார்.
அதில், அவர் ராஜ் நிடிமோருவைக் கட்டிப்பிடித்தவாறு இருக்கும் ஒரு புகைப்படத்தை வெளியிட்டு, “நான் என் நண்பர்கள் மற்றும் குடும்பத்தினரால் சூழப்பட்டுள்ளேன்… இது வெறும் ஆரம்பம் என்று எனக்குத் தெரியும்” என்று மிகுந்த நம்பிக்கையுடன் பதிவிட்டுள்ளார்.
