பிரிட்டிஷ் கொலம்பியாவைச் சேர்ந்த மருத்துவத்தாதி எமி ஹாம் (Amy Hamm), திருநங்கைகள் குறித்து “பாரபட்சமான மற்றும் இழிவான கருத்துக்களை” வெளியிட்டதாகக் கூறி, ஒரு மாதம் பணியிடை நீக்கம் செய்யப்பட்டுள்ளார்.
அத்துடன், சுமார் 94,000 கனடிய டொலர் அபராதத்தொகையைச் செலுத்தவும் அவர் உத்தரவிடப்பட்டுள்ளார்.
பிரிட்டிஷ் கொலம்பியா மருத்துவத்தாதிகள் கல்லூரி வெளியிட்ட ஒழுங்குமுறைத் தீர்ப்பில், எமி ஹாம் தனது சமூக ஊடகங்களில் 2018 முதல் 2021 வரையிலான காலப்பகுதியில் திருநங்கைகள் குறித்துப் பல சர்ச்சைக்குரிய கருத்துக்களை வெளியிட்டதாகத் தெரிவிக்கப்பட்டுள்ளது.
அவரது கருத்துக்கள், சமூகத்தில் திருநங்கைகளுக்கு எதிராக “பயம், இழிவு, மற்றும் சீற்றம்” ஆகியவற்றை ஏற்படுத்தும் நோக்கத்தில் வெளியிடப்பட்டதாக, அக்கல்லூரியின் ஒழுங்குமுறைக் குழு கண்டறிந்துள்ளது.
மருத்துவத்தாதிகள் சமூகத்தில் ஒரு முக்கிய மற்றும் நம்பகமான இடத்தைப் பெறுபவர்கள் என்றும், அவர்களின் கருத்துக்கள் சமத்துவமான மற்றும் பாரபட்சமற்ற சுகாதார சேவையை உறுதிசெய்யும் வகையில் இருக்க வேண்டும் என்றும் பிரிட்டிஷ் கொலம்பியா மருத்துவத்தாதிகள் கல்லூரி கூறியுள்ளது.
எமி ஹாம் தனது கருத்துக்களை ஒரு மருத்துவத்தாதி என்ற அடையாளத்துடன் வெளியிட்டதால், அது அவரது தொழில்முறை நடத்தைக்கு எதிரானது எனத் தீர்ப்பில் கூறப்பட்டுள்ளது.
இந்தத் தீர்ப்பை எதிர்த்து எமி ஹாம், பிரிட்டிஷ் கொலம்பியா உச்ச நீதிமன்றத்தில் (B.C. Supreme Court) மேல்முறையீடு செய்துள்ளமை சுட்டிக்காட்டத்தக்கது.
