பிரிட்டிஷ் கொலம்பியாவின் கிட்டிமாட் நகரத்தில் உள்ள எல்.என்.ஜி கனடா (LNG Canada) முனையத்திலிருந்து, கனடாவின் திரவமாக்கப்பட்ட இயற்கை எரிவாயு (LNG) சரக்கு, முதன்முறையாக ஆசிய சந்தைகளுக்குப் புறப்பட்டுள்ளது.
கனடாவின் எரிசக்தி வரலாற்றில் ஒரு முக்கிய மைல்கல்லாக நோக்கப்படுகின்றது.
திரவமாக்கப்பட்ட இயற்கை எரிவாயுவை ஏற்றிக் கொண்ட ‘காஸ்லாக் கிளாஸ்கோ’ (GasLog Glasgow) என்ற கப்பல், தென் கொரிய துறைமுகத்திற்குச் சென்றுள்ளது.
கனடாவும், அதன் மாகாணமான பிரிட்டிஷ் கொலம்பியாவும் தங்கள் திரவமாக்கப்பட்ட இயற்கை எரிவாயு ஏற்றுமதியைப் பல்வகைப்படுத்துவதற்கு இது வழிவகுக்கும் என்று எதிர்பார்க்கப்படுகிறது.
பத்து ஆண்டுகளுக்கும் மேலான உழைப்பின் விளைவான இந்த திட்டம், இப்பகுதிக்கு நீண்டகால பொருளாதார ஊக்கத்தை அளிக்கும் என்று கிட்டிமாட் நகர மேயர் பில் கெர்முத் நம்பிக்கை தெரிவித்துள்ளார்.
எல்.என்.ஜி கனடா என்பது.., ஷெல் (Shell) மற்றும் மலேசியாவின் பெட்ரோனாஸ் (Petronas), பெட்ரோசைனா (PetroChina), ஜப்பானின் மிட்சுபிஷி கார்ப். (Mitsubishi Corp.) மற்றும் தென் கொரியாவின் கோகாஸ் (KOGAS) ஆகியவற்றுக்கு இடையேயான ஒரு கூட்டு முயற்சியாகும்.
எல்.என்.ஜி கனடா வின் முதல் கட்டம் ஆண்டுக்கு 14 மில்லியன் தொன், எரிவாயுவை உற்பத்தி செய்யும் என்று எதிர்பார்க்கப்படுகிறது.
40 பில்லியன் டொலர் பெறுமதியான இந்தத் திட்டம் கனடாவின் வரலாற்றில் மிகப்பெரிய தனியார் துறை முதலீடாக, கனேடிய மத்திய அரசாங்கத்தால் அறிவிக்கப்பட்டுள்ளது.
