மட்டக்களப்பு சைவத் தமிழ் மன்றத்தின் ஏற்பாட்டில், சைவப்புலவரும் சைவபண்டிதருமான சுந்தரமூர்த்தி துஷ்யந்த் அவர்களால் எழுதப்பட்ட இரண்டு நூல்களின் வெளியீட்டு விழா எதிர்வரும் நவம்பர் 7ஆம் திகதி சனிக்கிழமை நடைபெறவுள்ளது.
“இந்துப் பண்பாட்டு மரபில் ஆகமங்கள்” மற்றும் “இந்துக் கோயில்களும் கலைகளும்” ஆகிய இரண்டு நூல்களே இதன்போது வெளியிட்டு வைக்கப்படவுள்ளன.
குறித்த நிகழ்வு நவம்பர் 7ஆம் திகதி பிற்பகல் 2.15 மணிக்கு, மட்டக்களப்பு பெரிய கல்லாறு இந்து இளைஞர் மன்றத்தில் நடைபெற ஏற்பாடு செய்யப்பட்டுள்ளது.
நிகழ்வின் தலைமையை சைவப்புலவர், சைவபண்டிதர், பேராசிரியர் தி. சதானந்தன் ஏற்கவுள்ளார். சிறப்பு ஆன்மீக அதிதியாக சிவஸ்ரீ இரா.கு. நடேஷ டுணஸ்கந்த சிவாச்சாரியார் கலந்து சிறப்பிக்கவுள்ளார். இவர் ஸ்ரீ சர்வார்த்த சித்தி விநாயகர் தேவஸ்தானம், பெரிய கல்லாறு ஆலயத்தின் குருக்களாவார்.
மேலும், நிகழ்வில் முத்தன்மை அதிதியாக சைவப்புலவர், சைவபண்டிதர் கலாநிதி எஸ். தில்லைநாதன் கலந்து கொள்ளவுள்ளார்.
இதன்போது அறிஞர்களின் உரைகள், நூல் அறிமுகம், ஆய்வுரைகள் உள்ளிட்ட பன்னிரண்டு நிகழ்வுகள் இடம்பெறவுள்ளன.
அத்துடன், பிரபல பேச்சாளர்கள் மற்றும் கல்வியாளர்களின் உரைகளும் இடம்பெறவுள்ளன. பிரதம அதிதிகளாக பேராசிரியர் சாந்தி கேசவன், பேராசிரியர் நா. வாமன், கலாநிதி ந. சுபராஜ் மற்றும் திருமதி ஹேமலோஜினி குமரன் ஆகியோர் பங்கேற்கவுள்ளனர்.
கௌரவ அதிதிகளாக வெ. கனகசுந்தரம், எஸ். பேரின்பராஜா மற்றும் த. சுந்தரலிங்கம் ஆகியோர் கலந்து சிறப்பிக்கவுள்ளனர்.
நிகழ்வின் கலை நிகழ்ச்சிகளின் ஒருங்கிணைப்பில் திருமதி பிரஷன்யா சுரேஷ், திருமதி ஷரணியா பபீஷன் மற்றும் சிவஸ்ரீ சு. விதுஷன் ஆகியோர் பங்கேற்கவுள்ளனர்.
தமிழ் மரபு, இந்துப் பண்பாடு, ஆலய வழிபாட்டு மரபுகள் மற்றும் கோயில் கலைகள் தொடர்பான அறிவையும் ஆய்வுகளையும் அடுத்த தலைமுறையினரிடம் கொண்டு சேர்க்கும் நோக்கில் இந்த நூல் வெளியீட்டு விழா ஏற்பாடு செய்யப்பட்டுள்ளமை குறிப்பிடத்தக்கது.
இந்நிகழ்வில் அனைவரையும் கலந்து கொண்டு சிறப்பிக்குமாறு ஏற்பாட்டாளர்கள் அன்புடன் அழைப்பு விடுத்துள்ளனர்.
