கியூபெக்கின் மொன்றியலுக்கு மேற்கே அமைந்துள்ள பின்கோர்ட் நகரின் உயர்நிலைப் பள்ளி ஒன்றில் தொடர்ச்சியாக இடம்பெறும் வன்முறைச் சம்பவங்கள், மாணவர்கள் மற்றும் பெற்றோர்களிடையே பெரும் கவலையை ஏற்படுத்தியுள்ளன.
ஷேன்-ப்ளூ உயர்நிலைப் பள்ளியில், இந்தக் கல்வியாண்டு தொடங்கியதிலிருந்து இடம்பெற்ற பல்வேறு சம்பவங்களைத் தொடர்ந்து, சுமார் 30 மாணவர்கள் இடைநீக்கம் செய்யப்பட்டுள்ளதாக உள்ளூர் பாடசாலை சேவை மையம் தெரிவித்துள்ளது.
கடந்த செவ்வாய்க்கிழமை, மதிய உணவு இடைவேளையின்போது மாணவர்கள் படிக்கட்டுப் பகுதியில் பட்டாசுகளை வெடித்துள்ளனர். இதனையடுத்து, தீயணைப்புப் படையினர் வரவழைக்கப்பட்டு, வகுப்புகள் மீண்டும் ஆரம்பிக்கப்படுவதற்கு முன்னர் மாணவர்கள் தற்காலிகமாக வெளியேற்றப்பட்டனர்.
இதற்கு முன்னதாக, செப்டம்பர் மாதத்தின் நடுப்பகுதியில், பாடசாலைக்கு அருகில் ஒருவர் துப்பாக்கியுடன் காணப்பட்டதாகக் கிடைத்த தகவலைத் தொடர்ந்து, காவல்துறையினர் நடவடிக்கை மேற்கொண்டனர். முன்னெச்சரிக்கை நடவடிக்கையாக அன்றைய தினம் பாடசாலையும் மூடப்பட்டது.
தொடர்ச்சியான சம்பவங்களைக் கட்டுப்படுத்தும் நோக்கில், இந்த மாத ஆரம்பத்தில் பாடசாலையில் பாதுகாப்புக் கண்காணிப்பு கமராக்கள் பொருத்தப்பட்டதுடன், கூடுதல் கண்காணிப்பாளர்களும் பாதுகாப்புப் பணியாளர்களும் நியமிக்கப்பட்டுள்ளனர்.
எனினும், பாடசாலையின் பாதுகாப்பு நடவடிக்கைகள் போதுமானதாக இல்லை எனச் சில பெற்றோர்கள் அதிருப்தி வெளியிட்டுள்ளனர்.
குறிப்பாக, புதிய கல்வியாண்டில் பாடசாலையில் இணைந்துள்ள இளைய மாணவர்கள் இத்தகைய சம்பவங்களால் மனரீதியாகப் பாதிக்கப்படுவதாக மாணவர்கள் கவலை தெரிவித்துள்ளனர்.
இதற்கிடையில், கியூபெக் மாகாணத்தின் பொதுப் பாடசாலைகளில் வன்முறைச் சம்பவங்கள் அதிகரித்து வருவதாகப் புதிய தரவுகள் சுட்டிக்காட்டுகின்றன.
பாடசாலை ஆதரவுப் பணியாளர்களுக்கு எதிரான வன்முறைச் சம்பவங்கள் கடந்த நான்கு ஆண்டுகளில் மூன்று மடங்காக அதிகரித்து, சுமார் 30 ஆயிரம் சம்பவங்களை எட்டியுள்ளதாகத் தெரிவிக்கப்படுகிறது. இவற்றில் உதைத்தல், குத்துதல், கடித்தல் மற்றும் கீறுதல் உள்ளிட்ட உடல்ரீதியான தாக்குதல்கள் 80 சதவீதத்திற்கும் அதிகமாக உள்ளன.
மேலும், மொன்றியல் நகரிலுள்ள 92 உயர்நிலைப் பாடசாலைகளில், ஏழாம் வகுப்பு முதல் பதினொன்றாம் வகுப்பு வரை கல்வி பயிலும் 5,800-க்கும் மேற்பட்ட மாணவர்களிடம் மேற்கொள்ளப்பட்ட ஆய்வின்படி, வன்முறை அனுபவித்த மாணவர்களின் விகிதம் 2016–2017 கல்வியாண்டில் 36 சதவீதமாக இருந்த நிலையில், 2022–2023 கல்வியாண்டில் 41 சதவீதமாக அதிகரித்துள்ளது.
கொவிட்-19 பெருந்தொற்றுக்குப் பின்னரான மனநலப் பாதிப்புகள், சமூகத் திறன்களில் ஏற்பட்ட மாற்றங்கள் மற்றும் இணையவழி வன்முறைகள் உள்ளிட்ட பல காரணிகள் இந்த அதிகரிப்புக்குப் பங்களித்திருக்கலாம் என ஆய்வாளர்கள் தெரிவிக்கின்றனர்.
இளைஞர்களிடையே வன்முறையைத் தடுப்பதற்கு ஆரம்பகட்டத்திலேயே தலையீடுகளை மேற்கொள்வதுடன், மாணவர்கள் சமூகத்தில் சிறப்பாக இணைந்து செயல்படுவதற்கான வாய்ப்புகளையும் ஆதரவையும் வழங்குவது அவசியம் என நிபுணர்கள் வலியுறுத்தியுள்ளனர்.
