மொன்றியல் காவல்துறையில் இளம் அதிகாரிகளின் எண்ணிக்கை அதிகரித்து வரும் நிலையில், அனுபவமிக்க அதிகாரிகளின் மேற்பார்வை குறைவது தொடர்பில் கவலைகள் எழுந்துள்ளன.
மொன்றியல்-நார்ட் பகுதியில் உள்ள காவல் நிலையம் 39-இல், அதிகாரிகளின் பணிமூப்பு மற்றும் அனுபவம் குறைந்து வருவதாக, சிபிசி நியூஸ் வெளியிட்டுள்ள புதிய தகவல்கள் தெரிவிக்கின்றன.
கடந்த ஐந்து ஆண்டுகளில், குறித்த நிலையத்தின் களமுனை ரோந்து அதிகாரிகளின் சராசரி சேவைக்காலம் 7.1 ஆண்டுகளில் இருந்து 4.2 ஆண்டுகளாகக் குறைந்துள்ளது. அதேவேளை, நிலையத்தின் ஒட்டுமொத்த பணியாளர்களின் சராசரி பணிமூப்பு 10.6 ஆண்டுகளில் இருந்து 8.5 ஆண்டுகளாக வீழ்ச்சியடைந்துள்ளது.
இந்த நிலையில், பணியில் இருந்தபோது வீடற்றவர்கள் மீது சிறுநீர் கழித்ததாகக் கூறப்படும் குற்றச்சாட்டைத் தொடர்ந்து, மூன்று ஆண்டுகள் மட்டுமே அனுபவமுள்ள காவல்துறை அதிகாரி ஒருவர் அண்மையில் இடைநீக்கம் செய்யப்பட்டுள்ளார்.
இதற்கு முன்னதாக, இனப் பாகுபாடு மற்றும் முறைகேடு தொடர்பான குற்றச்சாட்டுகளைத் தொடர்ந்து, ஜூன் மாதம் அந்த நிலையத்தின் 16 அதிகாரிகளைக் கொண்ட ரோந்துப் பிரிவு கலைக்கப்பட்டிருந்தது.
இச்சம்பவங்கள் தொடர்பில் கருத்துத் தெரிவித்துள்ள காவல்துறைத் தலைவர் ஃபாடி டகர், குறித்த விவகாரங்களில் சம்பந்தப்பட்ட பல அதிகாரிகள் ஐந்து ஆண்டுகளுக்கும் குறைவான அனுபவமுடையவர்கள் எனத் தெரிவித்துள்ளார்.
எனினும், அதிகாரிகளின் அனுபவம் குறைவது நிலையம் 39-க்கு மட்டும் உரிய பிரச்சினையல்ல என்றும், ஓய்வுபெறுதல்கள் காரணமாக மொன்றியல் காவல்துறையில் ஏற்பட்டுள்ள பரந்த பணியாளர் மாற்றத்தின் ஒரு பகுதி என்றும் காவல்துறை விளக்கமளித்துள்ளது.
கடந்த ஐந்து ஆண்டுகளில் தனது பணியாளர்களில் 35 சதவீதத்தினரைப் புதுப்பித்துள்ளதாகவும், கடந்த மூன்று ஆண்டுகளில் சுமார் ஆயிரம் புதிய அதிகாரிகளைப் பணியில் இணைத்துள்ளதாகவும் காவல்துறை தெரிவித்துள்ளது.
புதிய அதிகாரிகள் அனைவரும் 15 வாரகால ஒருங்கிணைப்புப் பயிற்சித் திட்டத்தில் இணைக்கப்படுவதாகவும், அனுபவமிக்க வழிகாட்டும் அதிகாரிகளின் உதவியுடன் பணியாற்றுவதாகவும் காவல்துறை குறிப்பிட்டுள்ளது.
இருப்பினும், மூத்த அதிகாரிகளின் நேரடி மேற்பார்வை இல்லாதபோது, தவறான நடத்தைகள் உரிய நேரத்தில் கண்டறியப்படாமல் போகும் அபாயம் உள்ளதாக நிபுணர்கள் சுட்டிக்காட்டுகின்றனர்.
மொன்றியல் உள்ள கியூபெக் பல்கலைக்கழகத்தின் சமூகவியல் பேராசிரியர் விக்டர் ஆர்மனி, காவல்துறையில் முறைகேடுகளைத் தடுப்பதற்கு வலுவான நிறுவனக் கட்டமைப்பும் அனுபவமிக்க அதிகாரிகளின் கண்காணிப்பும் அவசியம் எனத் தெரிவித்துள்ளார்.
இளம் தலைமுறை அதிகாரிகள் என்பதாலேயே இனப் பாகுபாடு போன்ற பிரச்சினைகள் தானாகவே நீங்கிவிடும் எனக் கருத முடியாது என்றும் அவர் எச்சரித்துள்ளார்.
இதற்கிடையில், நிலையம் 39-இல் அதிகாரிகளிடையே முறைகேடுகளை அனுமதிக்கும் துணைக் கலாச்சாரம் உருவாகியிருந்ததாக ஆவணங்கள் சுட்டிக்காட்டுவதாகவும் தகவல்கள் தெரிவிக்கின்றன.
எனவே, காவல்துறையில் புதிய அதிகாரிகளைப் பணியமர்த்துவதுடன், அவர்களுக்கு முறையான வழிகாட்டுதல், தொடர்ச்சியான கண்காணிப்பு மற்றும் பொறுப்புக்கூறலை உறுதிப்படுத்த வேண்டியதன் அவசியத்தையும் இந்த விவகாரம் மீண்டும் முன்னிலைப்படுத்தியுள்ளது.
