நடிகர் ‘அட்டக்கத்தி’ தினேஷ் நடிக்கவுள்ள புதிய திரைப்படத்திற்கு ‘பந்தா கேங்க்ஸ்’ என தலைப்பிடப்பட்டு, அதன் ஃபர்ஸ்ட் லுக் போஸ்டர் வெளியாகியுள்ளது.
தினேஷின் பிறந்தநாளை முன்னிட்டு படக்குழுவினர் இத்திரைப்படத்தின் தலைப்பையும் முதற்பார்வை போஸ்டரையும் வெளியிட்டுள்ளனர். இது ‘அட்டக்கத்தி’ தினேஷ் நடிக்கும் 26வது திரைப்படமாகும்.
இத்திரைப்படத்தை அறிமுக இயக்குநர் மதி ஆனந்த் எழுதி இயக்குகிறார். வி6 ஃபிலிம்ஸ் (V6 Films) பதாகையின் கீழ் வேலாயுதம்.எஸ் இப்படத்தைத் தயாரிக்கிறார்.
மேலும், சத்யபிரகாஷ் இத்திரைப்படத்திற்கு இசையமைக்கவுள்ளார்.
இப்படத்தில் நடிகை ஆனந்தி கதாநாயகியாக நடிக்கவுள்ளார்.
ஏற்கனவே ‘விசாரணை’ மற்றும் ‘இரண்டாம் உலகப்போரின் கடைசி குண்டு’ ஆகிய திரைப்படங்களைத் தொடர்ந்து, மூன்றாவது முறையாக தினேஷுடன் இணைந்து ஆனந்தி நடிக்கின்றார் என்பது குறிப்பிடத்தக்கது.
இவர்களுடன் நடிகர் லிங்கேஷ் மற்றும் சமூக ஊடகப் பிரபலம் ஹரி முனியப்பன் ஆகியோரும் இத்திரைப்படத்தில் முக்கிய கதாபாத்திரங்களில் நடிக்கின்றனர்.
இத்திரைப்படத்தில் நடிக்கும் ஏனைய நடிகர்கள் மற்றும் தொழில்நுட்பக் கலைஞர்கள் தொடர்பான மேலதிக விபரங்கள் மற்றும் அறிவிப்புகள் அடுத்தடுத்து வெளியிடப்படும் என எதிர்பார்க்கப்படுகிறது.
