மும்பையில் உள்ள இந்திய தொழில்நுட்பக் கழகத்தில் (IIT Bombay) இரண்டாம் ஆண்டு பி.டெக் படித்து வந்த 20 வயதான மாணவர் சஹில் வகோடே தற்கொலை செய்துகொண்ட சம்பவத்தைத் தொடர்ந்து, அம்மாணவரின் குடும்பத்தினரும் சக மாணவர்களும் நடத்திய போராட்டம் தீவிரமடைந்தது.
இதனையடுத்து, பேராசிரியர் சூர்யநாராயணா தூல்லாவின் டீன் பதவியை இடைநீக்கம் செய்து ஐஐடி பாம்பே நிர்வாகம் உத்தரவிட்டுள்ளது.
மாணவர் சஹில் வகோடே தேர்வு கண்காணிப்பில் ஈடுபட்டிருந்த பேராசிரியர் தூல்லா மீது தற்கொலைக்குத் தூண்டியமை மற்றும் சாதிப் பாகுபாடு காட்டியமை தொடர்பாகக் காவல் துறையில் வழக்குப் பதிவு செய்யப்பட்டுள்ளது.
இச்சம்பவத்தைக் கண்டித்து மாணவர்கள் தொடர் போராட்டத்தில் ஈடுபட்டதை அடுத்து, இயக்குநர் பேராசிரியர் ஷிரீஷ் கேதாரே, சூர்யநாராயணா தூல்லாவின் டீன் பதவியை உடனடி அமலுக்கு வரும் வகையில் இடைநீக்கம் செய்வதாக அறிவித்தார்.
எனினும், அவர் தொடர்ந்து பேராசிரியராகப் பணியாற்றுவார் என்றும், விசாரணைக்குப் பின்னரே அடுத்தகட்ட நடவடிக்கை எடுக்கப்படும் என்றும் தெரிவிக்கப்பட்டுள்ளது.
முன்னதாக, சஹில் வகோடே தேர்வின் போது ஏ.ஐ. (AI) தளத்தைப் பயன்படுத்தியதாக நிர்வாகம் வெளியிட்ட ஆரம்பகட்ட அறிக்கைக்கு மாணவர்கள் கடும் எதிர்ப்பு தெரிவித்தனர்.
உரிய விசாரணை முடிவடைவதற்கு முன்னரே இத்தகைய விவரங்களை வெளியிட்டது பொருத்தமற்றது எனக் கூறி, ஐஐடி பாம்பே நிர்வாகம் தனது உத்தியோகபூர்வ எக்ஸ் தளத்தில் பகிரங்க மன்னிப்புக் கோரியுள்ளது.
மாணவர்கள் சமர்ப்பித்த 18 அம்சக் கோரிக்கைப் பட்டியில் இயக்குநர் கையெழுத்திட்டுள்ள நிலையில், மும்பை குற்றப்பிரிவு பொலிஸார் இச்சம்பவம் குறித்து மேலதிக விசாரணைகளை முன்னெடுத்து வருகின்றனர்.
