டியாகோ கார்சியாவில் (Diego Garcia) அமைந்துள்ள அமெரிக்க – பிரித்தானிய கூட்டு இராணுவத் தளத்தின் சர்ச்சை தொடர்பான நிலவரத்திற்குத் தீர்வு காண்பதற்கு உழைப்பதாகப் பிரித்தானியப் பிரதமர் ஆண்டி பேர்ணம் (Andy Burnham), மொரிஷியஸ் பிரதமர் நவின் ராம்கூலமிடம் (Navin Ramgoolam) உறுதியளித்துள்ளார்.
சாஃகோஸ் தீவுகளின் (Chagos Islands) இறையாண்மையை மொரிஷியஸிற்கு விட்டுக்கொடுக்கவும், அதேவேளை டியாகோ கார்சியா தீவில் அமைந்துள்ள வியூக முக்கியத்துவம் வாய்ந்த இராணுவத் தளத்தை 99 ஆண்டுகளுக்குக் குத்தகைக்கு வைத்துக்கொள்ளவும் பிரித்தானியா கடந்த ஆண்டு ஒப்புக்கொண்டது.
இருப்பினும், அமெரிக்க அதிபர் டொனால்ட் ட்ரம்ப் இந்த ஒப்பந்தத்தை “பெரிய தவறு” என்று விமர்சித்ததைத் தொடர்ந்து, அமெரிக்காவின் எதிர்ப்புக் காரணமாக இந்த ஒப்பந்தத்தை அமல்படுத்துவதற்குத் தேவையான சட்ட நடைமுறைகள் நிறுத்தி வைக்கப்பட்டன.
இது தொடர்பாக டவுனிங் வீதியினால் வெளியிடப்பட்ட தகவலில், இராணுவத் தளத்தின் செயல்பாடுகளைப் பாதுகாப்பதுடன், பிரித்தானியாவின் தேசியப் பாதுகாப்பையும் உறுதிசெய்யும் வகையில் மொரிஷியஸ் மற்றும் அமெரிக்காவுடன் இணைந்து தீர்வை நோக்கிப் பணியாற்றப் பிரதமர் உறுதியளித்துள்ளதாகத் தெரிவிக்கப்பட்டுள்ளது.
இரு தலைவர்களும் நெருங்கிய தொடர்பில் இருக்கவும், இந்த வாரம் நியூயோர்க்கில் நடைபெறவுள்ள ஐக்கிய நாடுகள் பொதுச்சபைக் கூட்டத்தொடரில் இரு நாடுகளின் வெளியுறவு அமைச்சர்களும் சந்தித்துப் பேசவும் ஒப்புக்கொண்டுள்ளனர்.
பிரித்தானியா ஏற்கெனவே மொரிஷியஸுடன் ஒப்பந்தத்தில் கையெழுத்திட்டுள்ள போதிலும், இந்த அதிகாரப் பகிர்வை அமுல்படுத்துவதற்குத் தேவையான சட்டமூலம் பிரித்தானிய நாடாளுமன்றத்தில் இன்னும் முழுமையாக நிறைவேற்றப்படவில்லை.
ஆண்டி பேர்ணத்திற்கு முன்னர் இருந்த அரசினால் பேச்சுவார்த்தை நடத்தப்பட்ட இந்த ஒப்பந்தத்தின் கீழ், பிரித்தானியா டியாகோ கார்சியா தளத்தின் கட்டுப்பாட்டை சுமார் ஒரு நூற்றாண்டு காலத்திற்குத் தன்வசம் வைத்திருப்பதுடன் அங்குள்ள இராணுவச் செயல்பாடுகளையும் தொடர வழிவகுக்கிறது.
