ஆப்கானிஸ்தான் – பாகிஸ்தான் எல்லைப் பகுதியில் பாகிஸ்தான் அரசு நடத்திய வான்வழித் தாக்குதல்களில் குறைந்தபட்சம் 28 தீவிரவாதிகள் கொல்லப்பட்டதாக பாகிஸ்தான் தகவல் அமைச்சு தெரிவித்துள்ளது.
அதேநேரம், ஆப்கானியப் பகுதியில் நடத்தப்பட்ட இரவு நேர வான்வழித் தாக்குதலில் ஆண், பெண் மற்றும் சிறுமி உட்பட மூன்று பொதுமக்கள் கொல்லப்பட்டதாக ஆப்கானிஸ்தானில் உள்ள ஐக்கிய நாடுகளின் உதவிக்குழு (UNAMA) உறுதிப்படுத்தியுள்ளது.
ஆப்கானிஸ்தானின் பக்திகா (Paktika) மற்றும் குனார் (Kunar) ஆகிய மாகாணங்களை இலக்கு வைத்து இத்தாக்குதல்கள் நடத்தப்பட்டதாக பாகிஸ்தான் அதிகாரி ஒருவர் தெரிவித்துள்ளார்.
இந்த அத்துமீறலுக்கு தகுந்த பதிலடி கொடுக்கப்படும் என தலிபான் நிர்வாகத்தின் தலைமை செய்தித் தொடர்பாளர் சபிஹுல்லா முஜாஹித் தெரிவித்துள்ளார்.
அத்துடன், காபூலில் உள்ள பாகிஸ்தான் தூதரக அதிகாரியை அழைத்து தலிபான் வெளியுறவு அமைச்சு கண்டனக் குறிப்பை வழங்கியுள்ளது.
கடந்த வெள்ளிக்கிழமை பாகிஸ்தானின் கோஹாட் (Kohat) மாவட்டத்தில் உள்ள பொலிஸ் நிலையம் மீது இஸ்லாமிய தீவிரவாதிகள் நடத்திய தாக்குதலில் 24 பேர் கொல்லப்பட்டனர்.
இத்தாக்குதலுக்கு ‘ஷுரா இத்தேஹாத்-உல்-முஜாஹிதீன்’ என்ற அமைப்பு பொறுப்பேற்றிருந்தது.
மேலும், ஞாயிற்றுக்கிழமை ஹங்கு மாவட்டத்தில் நடந்த துப்பாக்கிச் சூட்டில் 6 பாகிஸ்தான் படைவீரர்களும் 8 தீவிரவாதிகளும் உயிரிழந்தனர்.
இவ்வாறான தாக்குதல்களுக்குப் பதிலடியாகவே பாகிஸ்தான் இந்த வான்வழித் தாக்குதல்களை நடத்தியுள்ளது.
குனார் மாகாணத்தில் உள்ள வீடு ஒன்றின் மீது நடத்தப்பட்ட தாக்குதலில் ஒரே குடும்பத்தைச் சேர்ந்த மூவர் உயிரிழந்ததுடன் நால்வர் காயமடைந்ததாக தலிபான் துணைச் செய்தித் தொடர்பாளர் ஹம்துல்லா ஃபித்ரத் தெரிவித்துள்ளார்.
பக்திகாவில் கடை ஒன்றும் காலியாக இருந்த வீடு ஒன்றும் சேதமடைந்துள்ளன.
எல்லை தாண்டிய தாக்குதல்களை நடத்தும் தீவிரவாதிகளுக்கு ஆப்கானிஸ்தான் புகலிடம் அளிப்பதாக பாகிஸ்தான் நீண்டகாலமாக குற்றம் சாட்டி வருகிறது.
எனினும் இக்குற்றச்சாட்டுகளை ஆப்கானிஸ்தான் தலிபான் அரசு மறுத்துள்ளதுடன், தீவிரவாதம் பாகிஸ்தானின் உள்நாட்டுப் பிரச்சினை என்றும் கூறியுள்ளது.
