கியூபெக் மாகாணத்தில் உள்ள ஷாடோகே (Châteauguay) பகுதியைச் சேர்ந்த 13 வயது சிறுமி ஒருவர் மர்மமான முறையில் காணாமல் போயுள்ளதாகக் காவல் துறையினர் தெரிவித்துள்ளனர்.
மியா பெர்ட்ரான்ட் (Mia Bertrand) என்ற அந்தச் சிறுமியைக் கண்டுபிடிப்பதற்குப் பொதுமக்கள் உடனடியாகத் தகவல் வழங்கி உதவுமாறு ஷாடோகே பொலிஸார் அவசரக் கோரிக்கை விடுத்துள்ளனர்.
ஷாடோகே பகுதியில் இருந்து மொன்றியலின் தென்மேற்குப் பகுதியில் அமைந்துள்ள அங்க்ரினன் (Angrignon) பேருந்து முனையத்தை நோக்கிச் சென்ற பேருந்து ஒன்றில் பயணம் செய்தபோதே சிறுமி மியா பெர்ட்ரான்ட் கடைசியாகக் காணப்பட்டுள்ளார்.
அதன் பின்னர் அவர் வீடு திரும்பவில்லை எனத் தெரிவிக்கப்பட்டுள்ளது.
சிறுமியின் பாதுகாப்பு மற்றும் உடல் ஆரோக்கியம் குறித்து அவரது குடும்பத்தினரும் உறவினர்களும் கடும் அச்சமும் கவலையும் அடைந்துள்ளதாகக் காவல் துறை அதிகாரிகள் தெரிவித்துள்ளனர்.
