தென்னிந்தியத் திரையுலகின் முன்னணி நட்சத்திரமான நடிகர் நாகார்ஜுனா தனது 67-வது பிறந்தநாளைக் கொண்டாடும் வகையில், ரசிகர்களுக்குச் சிறப்பான விருந்தாக அவரது 100-வது திரைப்படத்தின் தலைப்பு மற்றும் கிளிம்ப்ஸ் வீடியோவை படக்குழு அதிகாரப்பூர்வமாக வெளியிட்டுள்ளது.
1986-ஆம் ஆண்டு ‘விக்ரம்’ படத்தின் மூலம் கதாநாயகனாக அறிமுகமாகி, பல தசாப்தங்களாகத் தெலுங்கு சினிமாவில் தனக்கெனத் தனி முத்திரை பதித்த நாகார்ஜுனா, தற்போது திரையுலகில் 100 படங்களில் நடித்த அரிதான ஜாம்பவான்களின் பட்டியலில் இணைந்துள்ளார்.
தமிழ்ப் படங்களான ‘நித்தம் ஒரு வானம்’ மற்றும் ‘ஆகாசம்’ ஆகிய படைப்புகளை இயக்கி கவனம் ஈர்த்த இயக்குநர் ரா. கார்த்திக் இத்திரைப்படத்தை இயக்குகிறார்.
‘அன்னபூர்ணா ஸ்டுடியோஸ்’ நிறுவனம் தயாரிக்கும் இத்திரைப்படத்திற்கு ‘கிங் 100’ எனப் பெயரிடப்பட்டுள்ளது.
இப்படத்தில் நாகார்ஜுனா இரட்டை வேடங்களில் நடிக்கவுள்ளதாகக் கூறப்படும் நிலையில், வெளியாகி வைரலாகி வரும் கிளிம்ப்ஸ் வீடியோ ரசிகர்களிடையே பெரும் எதிர்பார்ப்பை ஏற்படுத்தியுள்ளது.
இத்திரைப்படம் வரும் டிசம்பர் மாதம் 24-ஆம் தேதி திரையரங்குகளில் பிரம்மாண்டமாக வெளியாக உள்ளது.
