மகாராஷ்டிர மாநிலம் நாக்பூரில் உள்ள ஒரு பிரபல தனியார் வங்கியின் 9 வெவ்வேறு கிளைகளில் போலி தங்க நகைகளை அசல் எனக் கூறி அடகு வைத்து ரூ.25 கோடி வரை சுருட்டிய பிரம்மாண்ட வங்கி மோசடி வழக்கின் முக்கிய சூத்திரதாரியான சச்சின் ராவத் என்பவரை பொருளாதார குற்றப்பிரிவு போலீசார் அதிரடியாகக் கைது செய்துள்ளனர்.
கடந்த ஐந்து மாதங்களாக காவல்துறையின் தீவிர தேடுதல் வேட்டையில் பிடிபடாமல் தலைமறைவாக இருந்த அவர் கைது செய்யப்பட்டதைத் தொடர்ந்து, இந்த பெரும் சதித்திட்டத்தில் தொடர்புடைய கைதானவர்களின் மொத்த எண்ணிக்கை 7 ஆக உயர்ந்துள்ளது.
கடந்த ஆண்டு அக்டோபர் மாதம் வங்கியின் மனிஷ் நகர் கிளையில் நடைபெற்ற வழக்கமான தணிக்கையின் போது, சில குறிப்பிட்ட கடன் கணக்குகளில் வைக்கப்பட்டிருந்த நகைகளின் தரம் மற்றும் எடை குறித்து தணிக்கையாளர்களுக்கு சந்தேகம் ஏற்பட்டது.
இதைத் தொடர்ந்து மேற்கொள்ளப்பட்ட விரிவான மறுஆய்வில், சுமார் 152 தங்கக் கடன் கணக்குகளின் மூலம் பல கோடி ரூபாய் மோசடி செய்யப்பட்டது வெளிச்சத்திற்கு வந்தது.
ஆரம்பத்தில் நேர்மையான வாடிக்கையாளராக நடித்து வங்கியின் நம்பிக்கையைப் பெற்ற சச்சின் ராவத், பின்னர் தனது பழைய இரும்பு வியாபாரத்தில் பணிபுரிந்த ஏழைத் தொழிலாளர்கள், உறவினர்கள் மற்றும் நண்பர்களின் பெயர்களைப் பயன்படுத்தி இந்தத் திட்டமிட்ட மோசடியை அரங்கேற்றியுள்ளார்.
இந்த மோசடி வலைப்பின்னலுக்கு வங்கியால் அங்கீகரிக்கப்பட்ட நகை மதிப்பீட்டாளர் தலா ரூ.5,000 லஞ்சம் பெற்றுக்கொண்டு 155 போலி மதிப்பீட்டுச் சான்றிதழ்களை வழங்கியதுடன், வங்கி மேலாளர்கள் மற்றும் தணிக்கையாளர்களும் உடந்தையாக இருந்துள்ளனர்.
கைது செய்யப்பட்ட குற்றவாளிகளின் வீடுகளில் நடத்தப்பட்ட சோதனையில் சொகுசு வாகனங்கள், கணினிகள் மற்றும் போலி கடன் ஆவணங்கள் பறிமுதல் செய்யப்பட்டுள்ளன.
முறைகேடாகச் சுருட்டப்பட்ட முழுப் பணத்தையும் மீட்பதற்கும், இதில் தொடர்புடைய பிற போலி வாடிக்கையாளர்களைக் கண்டறிவதற்கும் அடுத்தகட்ட விசாரணை தீவிரப்படுத்தப்பட்டு வருவதாகப் புலனாய்வு அதிகாரிகள் தெரிவித்துள்ளனர்.
