நவீன நீர் இடர் மீட்பு உபகரணங்களைக் கொள்முதல் செய்யுமாறு, மொன்றியல் மாநகரசபையை வலியுறுத்தும் தீயணைப்பாளர்கள் சங்கம்

மொன்றியல் பகுதியில் உள்ள புனித லாரன்ஸ் ஆற்றில் (St. Lawrence River) கொந்தளிப்பான அலையில் சிக்கித் தவித்த இரு காயக் (Kayak) படகோட்டிகளை, தீயணைப்புப் படையினரின் மீட்புப் படகால் நெருங்க முடியாமல் போனதை அடுத்து, அங்கிருந்த பொதுமகன் ஒருவர் Sea-Doo
நீச்சல் வாகனத்தில் சென்று பத்திரமாக மீட்டுள்ளார்.

மொன்றியலின் லாசால் (LaSalle) பகுதியில் உள்ள ‘ரொக் தீவு’ (Rock Island) அருகே இச்சம்பவம் இடம்பெற்றுள்ளது. இச்சம்பவத்தைத் தொடர்ந்து, அனைத்து வகை நீர்நிலைகளுக்கும் ஏற்ற நவீன நீர் இடர் மீட்பு உபகரணங்களை உடனடியாகக் கொள்வனவு செய்யுமாறு, மொன்றியல் தீயணைப்பாளர்கள் சங்கம் (Montreal Firefighters Association) நகராட்சி நிர்வாகத்தை வலியுறுத்தியுள்ளது.

ஆழமற்ற ஆற்றப் பகுதிகளுக்குப் பொருத்தமான சிறிய, நவீன உபகரணங்கள் தம்மிடம் இல்லை எனவும் இதனால் மீட்புப் பணிகளில் பெரும் பின்னடைவு ஏற்படுகிறது எனவும் மொன்றியல் தீயணைப்பாளர்கள் சங்கத்தின் செய்தித் தொடர்பாளர் மார்க்-அண்ட்ரே கோசெலின் (Marc- André Gosselin) தெரிவித்தார்.

லாசால் மற்றும் வெர்துன் (Verdun) எல்லைப் பகுதியில் புதிய மீட்பு மையம் ஒன்றை அமைப்பதுடன், அனைத்து வகையான நீர்நிலைகளிலும் மீட்புப் பணிகளை முன்னெடுப்பதற்கான புதிய சாதனங்களைக் கொள்முதல் செய்வதனை, நகரத்தின் அடுத்த வரவு செலவுத் திட்டத்தில் சேர்க்க வேண்டும் என்றும் மொன்றியல் தீயணைப்பாளர்கள் சங்கம் கோரிக்கை விடுத்துள்ளது.