நேட்டோ உச்சிமாநாட்டிற்குப் பின்னர் கனடாவும் அதன் கூட்டணி நாடுகளும் எதிர்கொள்ளும் மிகப்பெரிய சவால், பாதுகாப்புச் செலவினங்களுக்கான நிதி ஒதுக்கீடு தொடர்பானதாக மாறியுள்ளது.
நெதர்லாந்தின் ஹேக் நகரில் நடைபெற்ற நேட்டோ உச்சிமாநாட்டில், உறுப்புநாடுகள் 2035 ஆம் ஆண்டுக்குள் தங்களது மொத்த உள்நாட்டு உற்பத்தியின் 5 சதவீதத்தை பாதுகாப்புத் துறைக்காக ஒதுக்குவதற்கு இணக்கம் தெரிவித்துள்ளன.
இதில் 3.5 சதவீதம் நேரடி இராணுவச் செலவுகளுக்கும், மீதமுள்ள 1.5 சதவீதம் சைபர் பாதுகாப்பு, முக்கிய உள்கட்டமைப்பு பாதுகாப்பு மற்றும் பாதுகாப்புத் தொழில்துறை மேம்பாட்டிற்கும் பயன்படுத்தப்படவுள்ளது.
பல ஆண்டுகளாக நேட்டோவின் 2 சதவீத பாதுகாப்புச் செலவு இலக்கை எட்டுவதில் சவால்களை சந்தித்து வந்த கனடாவுக்கு, இந்த புதிய 5 சதவீத இலக்கு பெரும் நிதிச் சுமையை ஏற்படுத்தும் என பொருளாதார நிபுணர்கள் தெரிவிக்கின்றனர்.
கனடா பிரதமர் Mark Carney தலைமையிலான அரசு, பாதுகாப்பு முதலீடுகளை அதிகரிக்க வேண்டிய தேவையை ஏற்றுக்கொண்டுள்ள நிலையில், அதற்கான நிதி எவ்வாறு திரட்டப்படும் என்பது குறித்து அரசியல் மற்றும் பொருளாதார விவாதங்கள் தீவிரமடைந்துள்ளன.
ரஷ்யா – உக்ரைன் போர் உள்ளிட்ட உலகளாவிய பாதுகாப்பு அச்சுறுத்தல்கள் அதிகரித்து வரும் நிலையில், நேட்டோ நாடுகள் தங்களது பாதுகாப்புத் திறன்களை மேலும் வலுப்படுத்தும் நடவடிக்கைகளில் கவனம் செலுத்தி வருகின்றன.
இந்நிலையில், நேட்டோ உச்சிமாநாட்டின் பின்னர் சர்வதேச அரசியல் வட்டாரங்களில் அதிகம் பேசப்படும் கேள்வி ஒன்றே தற்போது எழுந்துள்ளது.
அதாவது – புதிய பாதுகாப்பு உறுதிமொழிகள் வழங்கப்பட்டுள்ள நிலையில், அதற்குத் தேவையான பல பில்லியன் டொலர் நிதியை அரசுகள் எவ்வாறு திரட்டப் போகின்றன என்பதே முக்கிய கேள்வியாக உருவெடுத்துள்ளது.
