முன்னாள் பிரதமர் ஜஸ்டின் ட்ரூடோவின் (Justin Trudeau) ஆட்சிக்காலத்தில் முன்வைக்கப்பட்ட சுற்றுச்சூழல் மற்றும் காலநிலை மாற்றக் கொள்கைகள் அதிக செலவீனங்களைக் கொண்டவை என்றும், அவை நாட்டைப் பிளவுபடுத்தும் வகையில் அமைந்திருந்தன என்றும் தற்போதைய பிரதமர் மார்க் கார்னி (Mark Carney) கடுமையான விமர்சனங்களை முன்வைத்துள்ளார்.
பிரதமர் மார்க் கார்னி தனது அதிகாரப்பூர்வ யூடியூப் (YouTube) தளப் பக்கத்தில் வெளியிட்டுள்ள காணொளித் தொடரிலேயே, இந்தக் கருத்துகளை வெளிப்படுத்தியுள்ளார்.
ஜஸ்டின் ட்ரூடோ தலைமையிலான முந்தைய லிபரல் அரசின் காலநிலை மாற்றத் திட்டங்களை, மார்க் கார்னி (Mark Carney) ஒட்டுமொத்தமாக நிராகரித்துப் பேசியுள்ளார்.
தமக்கு முன்னிருந்த அரசு வடிவமைத்த சுற்றுச்சூழல் கொள்கைகள் கனேடிய மக்களின் வாழ்வாதாரப் பொருளாதாரத்தைச் சீர்குலைக்கும் வகையில் அமைந்திருந்ததாக அவர், குற்றம் சாட்டியுள்ளார்.
தமது அரசு மேற்கொண்டுள்ள புதிய கொள்கை மாற்றங்களால் அடுத்த சில ஆண்டுகளுக்குக் நாட்டின் கார்பன் உமிழ்வு (Carbon Emissions) முந்தைய கணிப்புகளை விட அதிகமாகவே இருக்கும் என்பதையும் பிரதமர் பகிரங்கமாக ஒப்புக்கொண்டுள்ளமை குறிப்பிடத்தக்கது.
