அமெரிக்கா, கனடா மற்றும் மெக்சிகோ நாடுகளுக்கு இடையிலான குஸ்மா (CUSMA) வர்த்தக ஒப்பந்தம் தொடர்பான பேச்சுவார்த்தைகளைத் தொடங்குவதற்கு முன்பாகவே, அமெரிக்கா கனடாவிடம் பல கடுமையான நிபந்தனைகளை விதித்துள்ளது.
இதனை ஒரு ;நுழைவுக் கட்டணம் (Entry Fee) என்று அரசியல் வட்டாரங்கள் வர்ணிக்கின்றன. அமெரிக்க அதிபர் டொனால்ட் ட்ரம்ப்பின் நிர்வாகம், அதிகாரப்பூர்வ பேச்சுவார்த்தைகள் தொடங்குவதற்கு முன்னரே, கனடா சில முக்கிய சலுகைகளை வழங்க வேண்டும் என்று வலியுறுத்துவதாக கூறப்படுகின்றது.
பால் பண்ணை ஒதுக்கீட்டு முறை (Dairy Quotas), டிஜிட்டல் இறையாண்மைக் கொள்கைகள் மற்றும் மதுபான விற்பனை விதிகள் ஆகியவற்றில், கனடா மாற்றங்களைச் செய்ய வேண்டும் என்று அமெரிக்கா அழுத்தம் கொடுத்து வருகிறது.எனினும், பிரதமர் மார்க் கார்னி தலைமையிலான கனடா அரசு, இந்த விவகாரத்தில் மிகவும் நிதானமான போக்கைக் கடைபிடித்து வருகிறது.
ஏற்கனவே கடந்த ஆண்டு, அமெரிக்காவின் கோரிக்கையை ஏற்று சில வர்த்தக வரிகளை கனடா நீக்கிய போதிலும், அமெரிக்கா அதற்குப் பதிலாக எந்தச் சலுகையையும் வழங்கவில்லை.
இதனால், முக்கியமான பேச்சுவார்த்தை தொடங்கும் வரை சலுகைகளைக் கொடுக்க மார்க் கார்னியின் அரசு விரும்பவில்லை எனக் கூறப்படுகின்றது.
அமெரிக்கா சொல்லும் விதிகளுக்கு எல்லாம் நாங்கள் கட்டுப்பட முடியாது என்று பிரதமர் மார்க் கார்னி திட்டவட்டமாகத் தெரிவித்துள்ளார். வர்த்தகத்திற்காக அமெரிக்காவை மட்டுமே சார்ந்திராமல் ஏனைய நாடுகளுடன் உறவை வலுப்படுத்தவும் கனடா திட்டமிட்டுள்ளது. வர்த்தக ஒப்பந்தத்தின் மறுபரிசீலனை காலம் நெருங்கி வரும் வேளையில், இரு நாடுகளுக்கும் இடையே நிலவும் இந்த இழுபறி உலக நாடுகளின் கவனத்தை ஈர்த்துள்ளமை குறிப்பிடத்தக்கது.
