களனி பல்கலைக்கழகத்தின் பெண் மாணவியர் விடுதி ஒன்றில் ஏற்பட்ட தீ விபத்தில், மாணவிகளின் உடைமைகள் அனைத்தும் தீயில் எரிந்து நாசமாகியுள்ளன.
இந்தத் தீ விபத்து இன்று செவ்வாய்க்கிழமை (03) காலை இடம்பெற்றுள்ளது.
விடுதியிலுள்ள ஓர் அறையில் திடீரென தீ பரவியதைத் தொடர்ந்து, அந்த அறையில் இருந்த மாணவிகளின் உடைகள் உள்ளிட்ட அனைத்து தனிப்பட்ட உடைமைகளும் தீயில் எரிந்து சேதமடைந்துள்ளதாகத் தெரிவிக்கப்படுகிறது.
எனினும், தீ விபத்து ஏற்பட்ட சந்தர்ப்பத்தில் குறித்த அறையில் மாணவிகள் எவரும் இருக்கவில்லை எனத் தெரிவிக்கப்பட்டுள்ளது.
இதனால் உயிரிழப்புகளோ அல்லது காயங்களோ ஏற்படவில்லை என்பது குறிப்பிடத்தக்கது.
சம்பவ இடத்திற்கு விரைந்த தீயணைப்புப் படையினர், தீயைக் கட்டுப்பாட்டுக்குள் கொண்டுவரும் நடவடிக்கையில் ஈடுபட்டனர்.
இதேவேளை, தீ விபத்துக்கான காரணம் இதுவரை கண்டறியப்படவில்லை. இது தொடர்பான மேலதிக விசாரணைகள் முன்னெடுக்கப்பட்டு வருகின்றமை குறிப்பிடத்தக்கது.
