மொன்றியல் செயின்ட்-லியோனார்ட் பகுதியில் வாகனம் மோதி உயிரிழந்த 89 வயது முதியவரின் நினைவாக, விபத்து இடம்பெற்ற இடத்தில் வெள்ளை நிறக் காலணிகள் நிறுவப்பட்டுள்ளன.
கடந்த மே மாதம் 12ஆம் திகதி, ஜாரி மற்றும் லாஞ்செலியர் வீதிகளுக்கு அருகிலுள்ள வாகன நிறுத்துமிடத்தில் U-turn செய்ய முயன்ற வாகனம் ஒன்று, ஜியுசெப் டி ஜியோச்சினோ மீது மோதியுள்ளது. படுகாயமடைந்த அவர் 12 நாட்களுக்குப் பின்னர் உயிரிழந்தார்.
இந்நிலையில், அவரது குடும்பத்தினர் மற்றும் சமூக அமைப்புகளின் பிரதிநிதிகள் ஒன்றிணைந்து நினைவேந்தல் நிகழ்வை நடத்தியுள்ளனர்.
இதன்போது, வாகன நிறுத்துமிடங்களிலும் பாதசாரிகளின் பாதுகாப்பு உறுதிப்படுத்தப்பட வேண்டும் என்றும், ஓட்டுநர் பயிற்சிகள் மேலும் தீவிரப்படுத்தப்பட வேண்டும் என்றும் குடும்பத்தினர் வலியுறுத்தியுள்ளனர்.
2025ஆம் ஆண்டில் கியூபெக் மாகாணத்தில் 75 பாதசாரிகள் வாகன விபத்துகளில் உயிரிழந்துள்ளதாக SAAQ புள்ளிவிபரங்கள் தெரிவிக்கின்றன.
வாகனங்களைச் செலுத்தும்போது பாதசாரிகள் மற்றும் மிதிவண்டி ஓட்டிகள் தொடர்பில் கூடுதல் கவனத்துடன் செயற்படுமாறு அதிகாரிகள் அறிவுறுத்தியுள்ளனர்.
