மொன்றியல் நகரின் பொதுப் போக்குவரத்து வலையமைப்பில் பயணிகளின் பாதுகாப்பை மேம்படுத்துவதற்காக நகர நிர்வாகமும் Société de transport de Montréal (STM) நிறுவனமும் இணைந்து புதிய நடவடிக்கைகளை அறிவித்துள்ளன.
குறிப்பாக, மெட்ரோ நிலையங்களிலும் ரயில்களிலும் பாதுகாப்பு உணர்வை அதிகரிப்பது, அவசர நிலைகளில் விரைவாக உதவி வழங்குவது மற்றும் பயணிகளுக்கு ஏற்படும் இடையூறுகளைக் குறைப்பது ஆகியவற்றை இலக்காகக் கொண்டு ஆறு முக்கிய நடவடிக்கைகள் அறிவிக்கப்பட்டுள்ளன.
இதன்படி, 2027ஆம் ஆண்டின் இறுதிக்குள் 52 புதிய சிறப்பு பாதுகாப்பு அதிகாரிகளைப் படிப்படியாக நியமிப்பதற்கு நகரம் திட்டமிட்டுள்ளது. இதற்காக ஆண்டுதோறும் சுமார் 6.4 மில்லியன் டொலர் முதலீடு செய்யப்படவுள்ளது. புதிய நியமனங்கள் நிறைவடைந்ததும் சிறப்பு பாதுகாப்பு அதிகாரிகளின் எண்ணிக்கை 230 ஆக அதிகரிக்கும் என அறிவிக்கப்பட்டுள்ளது.
அதேவேளை, புதிய அதிகாரிகள் பணியில் இணையும் வரையில், இந்த இலையுதிர்காலம் முதல் மொன்றியல் பொலிஸ் சேவையான SPVM-இன் 12 மேலதிக பொலிஸ் அதிகாரிகள் மெட்ரோ வலையமைப்பில் பணியில் ஈடுபடுத்தப்படவுள்ளனர்.
மெட்ரோவில் மின்னணுக் கண்காணிப்பு வசதிகளை மேம்படுத்துவதற்கும் நிதி ஒதுக்கப்பட்டுள்ளது. மேலும், வீடற்ற நிலை, மனநெருக்கடி அல்லது சமூகப் பிரச்சினைகளை எதிர்கொள்ளும் நபர்களுக்கு உதவுவதற்காக சமூகப் பணியாளர்களின் பங்களிப்பும் அதிகரிக்கப்படவுள்ளது.
இன்னொரு முக்கிய அறிவிப்பாக, 2027ஆம் ஆண்டில் மெட்ரோ சேவையின் அடர்த்தியை ஐந்து சதவீதத்தால் அதிகரிக்கத் திட்டமிடப்பட்டுள்ளது. குறிப்பாக, மாலை நேரங்களில் கூடுதல் சேவைகளை வழங்குவதன் மூலம் பயணிகளின் காத்திருப்பு நேரத்தைக் குறைப்பது எதிர்பார்க்கப்படுகிறது.
மொன்றியல் மெட்ரோவைப் பயன்படுத்தும் தொழிலாளர்கள், மாணவர்கள் மற்றும் இரவு நேரங்களில் வேலை முடித்துத் திரும்புவோருக்கு இந்த மாற்றங்கள் முக்கியமானதாக அமையும் என எதிர்பாக்கப்படுகிறது.
