மக்கில் பல்கலைக்கழகத்தின் (McGill University) பகல்நேர பரோலில் (day parole) வெளிவந்துள்ள கைதி ஒருவர் கல்வி பயில அனுமதி வழங்கப்பட்ட விவகாரம் மீண்டும் கடும் சர்ச்சையை ஏற்படுத்தியுள்ளது.
ஜெப்ரி ஜோர்ஜ் ஈவர்ட் (Jeffrey George Ewert) என்ற இந்த நபர் கடந்த ஓகஸ்ட் மாதம் முதல் மக்கில் பல்கலைக்கழகத்தில் சட்ட வகுப்புகளில் கலந்துகொண்டு வந்தார்.
எனினும், கடந்த இம்மாதத் தொடக்கத்திலிருந்து அவர் மக்கில் பல்கலைக்கழக வளாகத்திற்குள் அனுமதிக்கப்படவில்லை.
60 வயதுடைய ஜெப்ரி ஜோர்ஜ் ஈவர்ட், பிரிட்டிஷ் கொலம்பியா மாகாணத்தில் கடந்த 1984 ஆம் ஆண்டு இரண்டு வெவ்வேறு தாக்குதல்களில் ஈடுபட்டு கொலை மற்றும் கொலை முயற்சி வழக்குகளில் தண்டனை பெற்றவராவார்.
அவர் ஒரு பெண்ணைப் பாலியல் வன்கொடுமை செய்து கொலை செய்ததோடு, மற்றொரு 15 வயது சிறுமியைத் தாக்கி வாழ்நாள் முழுவதும் முடங்கும் நிலைக்கு ஆளாக்கியதாகப் பரோல் ஆவணங்கள் தெரிவிக்கின்றன.
அவரது வன்முறைப் பின்னணி பல்கலைக்கழகத்தால் தங்களுக்கு முன்கூட்டியே தெரிவிக்கப்படவில்லை என்றும், இதனால் தாங்கள் பாதுகாப்பற்ற தன்மையை உணர்வதாகவும் சில மாணவர்கள் தெரிவித்ததை அடுத்தே, பல்கலைக்கழகத்தின் நிர்வாகம் இந்த முடிவினை மேற்கொண்டது.
இந்நிலையில், ஈவர்டை மீண்டும் வகுப்புகளுக்கு அனுமதிக்க வேண்டும் என வலியுறுத்தி சட்ட பீட மாணவர்களும் முன்னாள் மாணவர்களும் இணைந்து ஒரு மனுவில் கையெழுத்திட்டுள்ளனர்.
மூன்று சட்ட மாணவர்களால் தயாரிக்கப்பட்ட இந்த மனுவில் நூறுக்கும் மேற்பட்டோர் கையெழுத்திட்டுள்ளனர்.
உரிய முன்னறிவிப்பின்றி முறையான விசாரணையின்றி அவர் தடை செய்யப்படுவது நியாயமற்றது என்றும் அம்மனுவில் குறிப்பிடப்பட்டுள்ளது.
