1987ஆம் ஆண்டு கையெழுத்திடப்பட்ட இலங்கை – இந்திய ஒப்பந்தத்தின்படி, ஆயுதம் ஏந்திய அனைத்துத் தமிழ் இயக்கங்களுக்கும் பொதுமன்னிப்பு வழங்கப்பட்டதாக ஈரோஸ் கட்சியின் தலைவர் இராஜநாதன் பிரபாகரன் தெரிவித்துள்ளார்.
இந்த ஒப்பந்தத்தின் சரத்துகள் இன்னும் காலாவதியாகாத நிலையில், புலம்பெயர் தேசங்களில் தடை செய்யப்பட்டுள்ள சில தமிழ் மக்கள் மற்றும் தமிழ் அமைப்புகளுக்குப் பொதுமன்னிப்பு வழங்கித் தடையை நீக்க நடவடிக்கை எடுக்க வேண்டும் என அவர் வலியுறுத்தியுள்ளார்.
மட்டக்களப்பு வொய்ஸ் ஒப் மீடியாவில் சனிக்கிழமை(17) நடைபெற்ற ஊடகவியலாளர் சந்திப்பிலேயே அவர் இதனைத் தெரிவித்தார்.
தமிழ் மக்களின் தொடர்ச்சியான போராட்டங்கள் மற்றும் உயிர், சொத்து தியாகங்களுக்குப் பின்னரே 9 மாகாணங்களுக்குமான மாகாண சபை ஆட்சி முறைமை கொண்டுவரப்பட்டது எனச் சுட்டிக்காட்டிய அவர், இலங்கை – இந்திய ஒப்பந்தத்தின் முதன்மை அம்சமாக அனைத்துத் தமிழ் இயக்கங்களுக்கும் பொதுமன்னிப்பு வழங்கப்பட்டதாகக் குறிப்பிட்டார்.
இருப்பினும், தற்போதும் புலம்பெயர் நாடுகளில் உள்ள சில தமிழ் மக்களும் அமைப்புகளும் தடை செய்யப்பட்டுள்ளதால், போரினால் பாதிக்கப்பட்ட வடக்கு மற்றும் கிழக்கு மாகாணங்களின் அபிவிருத்திக்கு வரக்கூடிய கணிசமான பொருளாதார முதலீடுகள் தடைப்பட்டு வருகின்றன என அவர் தெரிவித்துள்ளார்.
புலம்பெயர் தமிழ் மக்கள் பல கோடி ரூபாய் பெறுமதியான முதலீடுகளை வைத்துள்ள நிலையில், அந்த நிதி இலங்கைக்கு வரும்பட்சத்தில் நாடும் வடகிழக்கு கிராமங்களும் அபிவிருத்தியடையும் என்றும் அவர் சுட்டிக்காட்டினார்.
எனவே, இலங்கை – இந்திய ஒப்பந்தத்தை மீளாய்வு செய்து, அதன் சரத்துகளின்படி புலம்பெயர் தமிழ் மக்கள் மற்றும் அமைப்புகளுக்கான தடையை நீக்க இந்திய அரசும் ஜனாதிபதி அனுரகுமார திஸாநாயக்க தலைமையிலான தற்போதைய அரசும் கவனத்தில் கொள்ள வேண்டும் என அவர் கோரிக்கை விடுத்துள்ளார்.
அத்துடன், இந்த ஒப்பந்தம் காலாவதியாகாததால் இந்தியா இதில் பாராமுகமாக இருக்க முடியாது என்றும், தற்போதைய அரசால் இதனை நடைமுறைப்படுத்த முடியும் என்றும் தெரிவித்த அவர், இது தொடர்பாக இலங்கை, இந்திய அரசுகளுக்கும் ஐக்கிய நாடுகள் சபைக்கும் மகஜர் கையளிக்கவுள்ளதாகவும் தெரிவித்தார்.
