யாழ்ப்பாணம் பருத்தித்துறை 751ஆம் இலக்க வழித்தடத்தில் பயணித்த தனியார் சிற்றூர்தி ஒன்று, சந்நிதி முருகன் ஆலயத்திற்கு சுமார் 500 மீற்றர் தொலைவுக்கு முன்னதாகப் பயணிகளை இறக்கிவிட்ட சம்பவம் இன்று இடம்பெற்றுள்ளது.
பருத்தித்துறையிலிருந்து யாழ்ப்பாணம் நோக்கிப் பயணித்த குறித்த சிற்றூர்தியில் பயணித்தவர்கள், ஆலயத்திற்கு முன்னதாகவே இறக்கிவிடப்பட்டதால், வயோதிபர்கள் உள்ளிட்ட பலர் எஞ்சிய தூரத்தை நடந்தே செல்ல வேண்டிய நிலை ஏற்பட்டுள்ளது.
வழமையாக, வெள்ளிக்கிழமைகளில் பருத்தித்துறையிலிருந்து யாழ்ப்பாணத்திற்கும், யாழ்ப்பாணத்திலிருந்து பருத்தித்துறைக்கும் 751ஆம் இலக்க வழித்தடத்தில் சேவையில் ஈடுபடும் பொதுப் போக்குவரத்து வாகனங்கள், சந்நிதி முருகன் ஆலயத்திற்கு முன்பாகப் பயணிகளை இறக்கிவிடுவது வழக்கமாகும் எனத் தெரிவிக்கப்படுகிறது.
இந்நிலையில், இன்றைய தினம் இடம்பெற்ற இந்தச் சம்பவம் தொடர்பில் பயணிகள் தமது அதிருப்தியை வெளியிட்டுள்ளனர்.
குறிப்பாக, ஆலயத்திற்குச் செல்லும் வயோதிபர்கள் உள்ளிட்ட பயணிகள் நடந்துசெல்ல வேண்டிய நிலை ஏற்பட்டமை பலரது விமர்சனங்களுக்கும் உள்ளாகியுள்ளது.
எனவே, குறித்த சம்பவம் தொடர்பில் விசாரணைகளை மேற்கொண்டு, பயணிகளின் நலனைக் கருத்திற்கொண்டு உரிய நடவடிக்கை எடுக்குமாறு பயணிகள் போக்குவரத்து அதிகார சபையிடம் பாதிக்கப்பட்டவர்கள் கோரிக்கை விடுத்துள்ளமை குறிப்பிடத்தக்கது.
