வவுனியா, மன்னார் மற்றும் முல்லைத்தீவு மாவட்டங்களைச் சேர்ந்த 107 பெண் தலைமைத்துவக் குடும்பங்களின் வாழ்வாதாரத்தை மேம்படுத்தும் நோக்கில், 11.8 மில்லியன் ரூபாய் செலவில் சுயதொழில் உபகரணங்கள் வழங்கி வைக்கப்பட்டுள்ளன.
உபகரணங்கள் வழங்கும் நிகழ்வு இன்று வவுனியா கிராமிய அபிவிருத்தித் திணைக்களத்தின் பல்நோக்கு பயிற்சி மண்டபத்தில் நடைபெற்றது.
மகளிர் விவகார அமைச்சின் செயலாளர் திருமதி எ. அன்ரன் யோகநாயகம் தலைமையில் நடைபெற்ற இந்நிகழ்வில், கூட்டுறவு அபிவிருத்திப் பிரதி அமைச்சர் உப்பாலி சமரசிங்க, வன்னி நாடாளுமன்ற உறுப்பினர் ம. ஜெகதீஸ்வரன், வவுனியா மாவட்டச் செயலாளர் பி.ஏ. சரத்சந்திர, மன்னார் மாவட்டச் செயலாளர் க. கனகேஸ்வரன் உள்ளிட்ட அரச அதிகாரிகள் மற்றும் பயனாளிகள் பலரும் கலந்துகொண்டனர்.
பெண் தலைமைத்துவக் குடும்பங்களின் பொருளாதார நிலையை மேம்படுத்தி, சுயதொழில் வாய்ப்புகள் ஊடாக அவர்களின் வாழ்வாதாரத்தை வலுப்படுத்தும் நோக்கில் இந்த உதவிகள் வழங்கப்பட்டுள்ளன.
