யாழ்ப்பாணம், நெல்லியடி பகுதியில் புதிதாக மதுபானசாலை அமைப்பதற்கு வழங்கப்பட்ட அனுமதியை இரத்துச் செய்யக் கோரி, பொதுமக்கள் இன்று திங்கட்கிழமை கண்டனப் போராட்டமொன்றை முன்னெடுத்துள்ளனர்.
மண்டான் கலைநேசன் சனசமூக நிலையத்திற்கு அருகில் ஆரம்பமான இந்தப் போராட்டம், பேரணியாக மண்டானில் அமைந்துள்ள மதுவரித் திணைக்கள அலுவலகத்தைச் சென்றடைந்தது. அங்கு தமது எதிர்ப்பை வெளிப்படுத்திய போராட்டக்காரர்கள், மதுபானசாலைக்கான அனுமதியை இரத்துச் செய்யுமாறு கோரிக்கை விடுத்தனர்.
இதன்போது, மதுபானசாலை அமைப்பதற்கு எதிராகப் பொதுமக்களிடம் சேகரிக்கப்பட்ட கையொப்பங்கள் அடங்கிய மகஜர், மதுவரித் திணைக்களத்தின் பொறுப்பு அதிகாரியிடம் கையளிக்கப்பட்டது. குறித்த மகஜர் மேலதிக நடவடிக்கைகளுக்காக மதுவரித் திணைக்கள ஆணையாளருக்கு அனுப்பி வைக்கப்படவுள்ளது.
யாழ்ப்பாண மாவட்டத்தில் சங்கானை, கோப்பாய், தெல்லிப்பழை மற்றும் கரவெட்டி ஆகிய பிரதேச செயலகப் பிரிவுகளில் தலா ஒன்று என்ற அடிப்படையில் புதிதாக நான்கு மதுபானசாலைகளுக்கு அனுமதி வழங்கப்பட்டுள்ளதாகத் தெரிவிக்கப்படுகிறது.
இதற்கு எதிராக ஏற்கனவே தெல்லிப்பழை மற்றும் சங்கானை பகுதிகளில் போராட்டங்கள் முன்னெடுக்கப்பட்டுள்ளன.
காங்கேசன்துறை பகுதியில் வழங்கப்பட்ட மதுபானசாலை அனுமதியை இரத்துச் செய்யக் கோரி, கடந்த வியாழக்கிழமை தெல்லிப்பழை சந்தியில் போராட்டம் நடத்தப்பட்டதுடன், பிரதேச செயலரிடமும் மகஜர் கையளிக்கப்பட்டது.
அதேபோன்று, சங்கானை பகுதியில் வழங்கப்பட்ட அனுமதியை இரத்துச் செய்யக் கோரி, கடந்த வெள்ளிக்கிழமை பேருந்து நிலையத்திற்கு முன்பாகப் போராட்டம் நடத்தப்பட்டு, பிரதேச செயலரிடம் மகஜர் சமர்ப்பிக்கப்பட்டது.
இந்த நிலையில், கரவெட்டி பிரதேச செயலகப் பிரிவுக்கு உட்பட்ட நெல்லியடியில் இன்று போராட்டம் முன்னெடுக்கப்பட்டுள்ளது.
யாழ்ப்பாணத்தில் புதிதாக மதுபானசாலைகள் அமைப்பதற்கு எதிராகப் பல்வேறு பகுதிகளிலும் பொதுமக்கள் தொடர்ச்சியாக எதிர்ப்புத் தெரிவித்து வருகின்றமை குறிப்பிடத்தக்கது.
