தையிட்டி சட்டவிரோத விகாரைக்கு எதிராக போராடியவர்கள் மீதான வழக்கு விசாரணைகள் எதிர்வரும் ஜனவரி மாதத்திற்கு திகதியிடப்பட்டுள்ளது.
தையிட்டி விகாரைக்கு எதிராக போராட்டம் நடத்தினார்கள் என குற்றம்சாட்டி , வேலன் சுவாமிகள் , வலி.கிழக்கு பிரதேச சபை தவிசாளர் , வலி.வடக்கு பிரதேச சபை உறுப்பினர்கள், காணி உரிமையாளர்கள் உள்ளிட்டவர்களுக்கு எதிராக பலாலி பொலிஸாரினால் மல்லாகம் நீதவான் நீதிமன்றில் வழக்குகள் தாக்கல் செய்யப்பட்டு விசாரணைகள் இடம்பெற்று வருகின்றன.
இந்நிலையில் குறித்த வழக்குகள் இன்றைய தினம் வியாழக்கிழமை விசாரணைக்கு எடுத்துக்கொள்ளப்பட்ட போது , குற்றம் சாட்டப்பட்டு நீதிமன்றினால் பிணையில் விடுவிக்கப்பட்டுள்ளவர்கள் மன்றில் முன்னிலையாகி இருந்தனர்.
அதனை தொடர்ந்து நடைபெற்ற விசாரணைகளை அடுத்து வழக்கு விசாரணைகளை எதிர்வரும் ஜனவரி மாதம் 07ஆம் திகதிக்கு மன்று திகதியிட்டுள்ளது.
அதேவேளை கடந்த வியாழக்கிழமையும் விகாரைக்கு எதிராக போராடியவர்களுக்கு எதிராக தொடரப்பட்ட மற்றுமொரு வழக்கு விசாரணைக்கு எடுத்துக்கொள்ளப்பட்ட போது, குறித்த வழக்கும் ஜனவரி 7ஆம் திகதிக்கு திகதியிடப்பட்டுள்ளமையும் குறிப்பிடத்தக்கது.
