கால்நடை வைத்திய அதிகாரிகள் முன்வைத்துள்ள கோரிக்கைகள் தொடர்பில் உரிய தரப்பினருடன் கலந்துரையாடி தீர்வு காணத் தயாராக இருப்பதுடன், பதவியுயர்வுக்கான புள்ளித் திட்டமிடல் முறை தொடர்பில் மறுபரிசீலனை செய்து விரைவாகத் திருத்தங்களை மேற்கொள்ள நடவடிக்கை எடுக்கப்படும் என வடக்கு மாகாண ஆளுநர் நா.வேதநாயகன் தெரிவித்தார்.
அரச கால்நடை வைத்திய அதிகாரிகள் சங்கத்தின் வடக்கு மாகாணக் கிளை பிரதிநிதிகளுக்கும் வடக்கு மாகாண ஆளுநர் நா.வேதநாயகனுக்கும் இடையிலான கலந்துரையாடல் நேற்றைய தினம் திங்கட்கிழமை ஆளுநர் செயலகத்தில் நடைபெற்றபோதே ஆளுநர் இவ்வாறு தெரிவித்தார்.
இதன்போது வடக்கு மாகாண கால்நடை வைத்திய அதிகாரிகள் சங்கத்தின் பிரதிநிதிகள்,
தமது பதவியுயர்வுகளுக்கான புள்ளித் திட்டமிடலில் பாரபட்சம் காணப்படுவதாகக் குறிப்பிட்டு, அதனை மறுபரிசீலனை செய்து மாற்றியமைக்க வேண்டும். தமக்கு இதுவரை நடைமுறைக்கு ஏற்ற கடமைப் பட்டியல் வழங்கப்படவில்லை , அதனை உரிய முறையில் தயாரித்து வழங்க வேண்டும்
அலுவலகக் கடமைகள் மற்றும் வெளிக்கள சிகிச்சைப் பணிகள் உள்ளிட்ட பல்வேறு பணிகளுக்கு ஏற்ற வகையிலான வரவுப் பதிவு நடைமுறை இல்லாதுள்ளது என கால்நடை வைத்திய அதிகாரிகள் பல ஆண்டுகளாக தமது சேவையை வினைத்திறனுடன் வழங்குவதில் பல்வேறு நிர்வாக மற்றும் பணிசார் இடர்பாடுகளை எதிர்நோக்கி வருவதாகவும் சங்கப் பிரதிநிதிகள் ஆளுநரிடம் தெரிவித்தனர்.
இதற்குப் பதிலளித்த ஆளுநர் நா.வேதநாயகன்,
எந்தவொரு விடயத்துக்கும் கலந்துரையாடல் மூலமே தீர்வு காண முடியும். ஒரு முடிவை எடுத்துவிட்டு, அதனை நடைமுறைப்படுத்தப் போவதாக அறிவித்த பின்னர் கலந்துரையாடுவதற்கு இடமில்லை. எனவே, நீங்கள் முன்வைக்கும் பிரச்சினைகளை உரிய முறையில் கலந்துரையாடித் தீர்வு காண நாங்கள் தயாராக இருக்கின்றோம்
அதிகாரிகளுக்கும் கால்நடை வைத்திய அதிகாரிகளுக்கும் இடையில் நல்ல உறவு நிலவுவது அவசியம். அத்தகைய நல்லுறவு காணப்படும் போதுதான் பண்ணையாளர்களுக்கு சிறந்த சேவையை வழங்குவதுடன், உங்களது பணிச்சூழலையும் சிறப்பாக அமைத்துக்கொள்ள முடியும்.
நிர்வாகத்தின் மீதான அல்லது அதிகாரிகள் மீதான அதிருப்தியைப் பண்ணையாளர்கள் மீது வெளிப்படுத்தக்கூடாது.
பதவியுயர்வுக்கான புள்ளித் திட்டமிடல் தொடர்பில் முன்வைக்கப்பட்ட கோரிக்கையை மறுபரிசீலனை செய்து, தேவையான திருத்தங்களை விரைவாக மேற்கொண்டு நடைமுறைப்படுத்த நடவடிக்கை எடுக்கப்படும்.
வருகைப் பதிவு தொடர்பில் கைவிரல் அடையாள முறையைப் பின்பற்றுவது பொதுநிர்வாக, உள்நாட்டலுவல்கள் அமைச்சின் சுற்றறிக்கைக்கு உட்பட்ட விடயம் என்பதால் அதனை மீற முடியாது. இருப்பினும் பணியாற்றும் கால்நடை வைத்திய அதிகாரிகளுக்குரிய கொடுப்பனவுகளைப் பெற்றுக்கொடுப்பதற்கான பொருத்தமான பொறிமுறையொன்றை உருவாக்க நடவடிக்கை எடுக்கப்படும்.
அத்துடன், கால்நடை வைத்திய அதிகாரிகளால் கோரப்பட்டுள்ள கடமைப் பட்டியல், ஆளணி உள்ளிட்ட ஏனைய பணிசார் விடயங்கள் தொடர்பில் அமைச்சின் செயலாளர் மற்றும் மாகாணப் பணிப்பாளர் உள்ளிட்ட சம்பந்தப்பட்ட அதிகாரிகளை இணைத்துக் கொண்டு விரிவாக ஆராய்வதற்கான கலந்துரையாடல் ஒன்றை விரைவில் ஏற்பாடு செய்வோம் என ஆளுநர் தெரிவித்தார்.
இந்தக் கலந்துரையாடலில் வடக்கு மாகாண ஆளுநரின் செயலாளர், ஆளுநரின் பிரத்தியேகச் செயலாளர் மற்றும் அரச கால்நடை வைத்திய அதிகாரிகள் சங்கத்தின் வடக்கு மாகாணக் கிளை பிரதிநிதிகள் கலந்துகொண்டனர்.
