கனடாவில் பிறந்து வளர்ந்த இலங்கைத் தமிழ் பூர்வீகத்தைக் கொண்ட நடிகை மைத்ரேயி ராமகிருஷ்ணனின் அடையாளம் தொடர்பான கருத்துகள் தற்போது சமூக வலைத்தளங்களில் பேசுபொருளாகியுள்ளன.
Netflix-இன் புதிய திரைப்படமான “Best of the Best” திரைப்படத்தை விளம்பரப்படுத்தும் நிகழ்வுகளில் பங்கேற்ற மைத்ரேயி ராமகிருஷ்ணன், தன்னை “Tamil Eelam woman” என அடையாளப்படுத்திப் பேசியிருந்தார்.
தனது நாடு கனடா என்றும், தனது குடும்பத்தின் வேர்கள் இலங்கையில் இருப்பதாகவும், தனது கலாசார அடையாளம் தமிழ் என்றும் அவர் முன்னதாகவும் கூறியுள்ளார்.
இந்தக் கருத்துகளைத் தொடர்ந்து, இலங்கையில் சில சமூக வலைத்தளப் பக்கங்களில் அவருக்கு எதிராக விமர்சனங்கள் முன்வைக்கப்பட்டுள்ளன.
மேலும், அவர் நடித்துள்ள “Best of the Best” திரைப்படத்திற்கு எதிராக IMDb உள்ளிட்ட இணைய தளங்களில் ஒரே நட்சத்திர மதிப்பீடுகளை வழங்குமாறு சில சமூக ஊடகப் பதிவுகள் மூலம் அழைப்பு விடுக்கப்பட்டதாக செய்திகள் வெளியாகியுள்ளன.
இந்த விவகாரம் தொடர்பாக IMDb தளத்தில் “unusual voting activity” எனப்படும் அசாதாரண வாக்குப்பதிவு தொடர்பான எச்சரிக்கை காணப்பட்டதாக தெரிவிக்கப்பட்டுள்ளது.
இதனிடையே, மைத்ரேயி ராமகிருஷ்ணனின் ஈழத் தமிழ் அடையாளம் மற்றும் அவர் நடித்த திரைப்படம் தொடர்பான விவாதம், பரதநாட்டியம் மற்றும் தமிழ் கலாசார பிரதிநிதித்துவம் குறித்தும் விரிவடைந்துள்ளது.
மைத்ரேயி ராமகிருஷ்ணன், “Never Have I Ever” என்ற Netflix தொடரின் மூலம் சர்வதேச அளவில் பிரபலமானவர் என்பதும் குறிப்பிடத்தக்கது.
இதேவேளை, மைத்ரேயிக்கு எதிரான சமூக வலைத்தளத் தாக்குதல்களை நிறுத்த வேண்டும் என பலரும் கோரிக்கை விடுத்துள்ளதாகவும் செய்திகள் வெளியாகியுள்ளன.
மைத்ரேயி ராமகிருஷ்ணனின் தனிப்பட்ட அடையாளக் கருத்துகளைத் தொடர்ந்து உருவாகியுள்ள இந்த விவாதம், தற்போது இலங்கையிலும் புலம்பெயர் தமிழர் சமூகங்களிலும் சமூக வலைத்தளங்களில் தொடர்ந்தும் பேசப்பட்டு வருகிறது.
