மன்னார் மாவட்டத்தின் சுற்றுலாத்துறையை மேம்படுத்தும் நோக்கில், தலைமன்னாரில் ராமர் பாலத்துடன் தொடர்புடைய எட்டு மணல் திட்டுகளை மக்கள் மற்றும் சுற்றுலாப் பயணிகள் பார்வையிடுவதற்கான படகு சேவையை ஆரம்பிக்க நடவடிக்கை எடுக்கப்பட்டுள்ளதாக மன்னார் மாவட்ட அரசாங்க அதிபர் க.கனகேஸ்வரன் தெரிவித்துள்ளார்.
உலக சுற்றுலா தினத்தை முன்னிட்டு, எதிர்வரும் 25ஆம் திகதி காலை இந்த படகு சேவைக்கான வெள்ளோட்ட நடவடிக்கை முன்னெடுக்கப்படவுள்ளதாகவும் அவர் குறிப்பிட்டுள்ளார்.
வடமாகாண சுற்றுலா பணியகத்தின் ஏற்பாட்டில், மன்னாரில் எதிர்வரும் 25ஆம் திகதி முதல் 27ஆம் திகதி வரை உலக சுற்றுலா தின நிகழ்வுகள் நடைபெறவுள்ளன.
இதற்கான ஏற்பாடுகள் தொடர்பான விசேட கலந்துரையாடல் இன்று (23) மாலை மன்னார் மாவட்ட செயலக மாநாட்டு மண்டபத்தில் நடைபெற்றது. வடமாகாண சுற்றுலா பணியகத்தின் தலைவர் கலாநிதி ஜெகநாதன் விவேகானந்தன் பங்கேற்றிருந்ததுடன், மாவட்ட அரசாங்க அதிபர் க.கனகேஸ்வரன் தலைமையில் கலந்துரையாடல் இடம்பெற்றது.
மன்னார் மாவட்டத்தில் அடையாளம் காணப்பட்டுள்ள 80க்கும் மேற்பட்ட சுற்றுலா தலங்களை மேம்படுத்தும் நடவடிக்கைகளின் ஒரு பகுதியாக, கீரி பீச்சை மையமாகக் கொண்டு இம்முறை உலக சுற்றுலா தின நிகழ்வுகள் ஏற்பாடு செய்யப்பட்டுள்ளன.
நிகழ்வின் போது மன்னார் மாவட்டத்திற்கே உரித்தான பாரம்பரிய உணவு வகைகளை அறிமுகப்படுத்தும் உணவுத் திருவிழா, நாட்டியம், வில்லுப்பாட்டு உள்ளிட்ட கலாசார நிகழ்வுகளும் இடம்பெறவுள்ளன.
மேலும், மாவட்டத்தில் வாழும் பல்வேறு மத சமூகங்களின் கலாசார அடையாளங்களை பிரதிபலிக்கும் கலை நிகழ்வுகளும் ஏற்பாடு செய்யப்பட்டுள்ளதாக தெரிவிக்கப்பட்டுள்ளது.
விளையாட்டு நிகழ்வுகளும் விழாவின் முக்கிய அம்சமாக இடம்பெறவுள்ளன. எதிர்வரும் 25ஆம் திகதி பட்டப் போட்டிகளும், 26ஆம் திகதி கடற்கரைப் பந்தாட்டம் மற்றும் கயிறு இழுத்தல் போட்டிகளும், 27ஆம் திகதி மாலை 4 மணிக்கு கபடிப் போட்டியும் நடைபெறவுள்ளன.
இந்த நிகழ்வுகள் மூலம் மன்னார் மாவட்டத்தின் சுற்றுலாத்துறையை மேலும் முன்னேற்றும் வாய்ப்பை உருவாக்க எதிர்பார்ப்பதாக மாவட்ட அரசாங்க அதிபர் தெரிவித்துள்ளார்.
இதேவேளை, ராமர் பாலத்துடன் தொடர்புடைய எட்டு மணல் திட்டுகளை பார்வையிடுவதற்கான படகு சேவை ஆரம்பிக்கப்படுவது மன்னார் மாவட்ட சுற்றுலாத்துறையில் முக்கியமான புதிய நடவடிக்கையாக அமையும் எனவும் அவர் குறிப்பிட்டுள்ளார்.
வெள்ளோட்டத்தைத் தொடர்ந்து, வெகுவிரைவில் பொதுமக்கள் மற்றும் சுற்றுலாப் பயணிகள் அந்த மணல் திட்டுகளை நேரடியாக சென்று பார்வையிடுவதற்கான ஏற்பாடுகள் மேற்கொள்ளப்படவுள்ளதாகவும் மாவட்ட அரசாங்க அதிபர் தெரிவித்துள்ளார்.
