அமெரிக்க நிறுவனங்களிடமிருந்து வணிக ரகசியங்களைத் திருடித் தனது தொலைத்தொடர்பு சாம்ராஜ்யத்தை உருவாக்கிய ஒரு “குற்றவியல் கும்பல்” என்று சீன நிறுவனமான ஹவாய் (Huawei) மீது அமெரிக்க அரசுத் தரப்பு வழக்கறிஞர் புரூக்ளின் கூட்டாட்சி நீதிமன்றத்தில் குற்றம் சாட்டியுள்ளார்.
20 ஆண்டுகளாக அமெரிக்க நிறுவனங்களைப் பாதிப்புக்குள்ளாக்கியும், நிதி அமைப்பைத் தவறாகப் பயன்படுத்தியும் உலகம் முழுவதும் ஆதிக்கம் செலுத்த ஹவாய் முயன்றதாக அமெரிக்க அரசுத் தரப்பு வழக்கறிஞர் டெய்லர் ஸ்டவுட் தெரிவித்துள்ளார். சிஸ்கோ சிஸ்டம்ஸ் நிறுவனத்தின் இயங்குதள மூலக் குறியீடு (operating system source code) மற்றும் டி-மொபைல் நிறுவனத்தின் போன்களைப் பரிசோதிக்கும் ரோபோடிக் கை உட்பட ஐந்து அமெரிக்க நிறுவனங்களிடமிருந்து வணிக ரகசியங்களைத் திருட ஹவாய் சதித் திட்டம் தீட்டியதாக குற்றம் சாட்டப்பட்டுள்ளது.
இருப்பினும் இக்குற்றச்சாட்டுகளை ஹவாய் தரப்பு மறுத்துள்ளது. இது குற்றவியல் சதி அல்ல, சாதாரண வணிக போட்டி மற்றும் கண்டுபிடிப்பு என்று ஹவாய் வழக்கறிஞர் பிரையன் ஹெபர்லிக் வாதாடினார். தனிப்பட்ட ஊழியர்களின் தவறான நடவடிக்கைகளை அரசுத் தரப்பு குற்றவியல் நடவடிக்கைகளாகத் திரித்துக் காட்டுவதாகவும் அவர் தெரிவித்தார்.
இதனிடையே, சீன நிறுவனங்கள் மீதான அமெரிக்காவின் அடக்குமுறையைத் தன் அரசு கடுமையாக எதிர்ப்பதாகச் சீன வெளியுறவு அமைச்சக செய்தித் தொடர்பாளர் இன்று வியாழக்கிழமை தெரிவித்தார்.
ஈரானில் தனது வணிகத்தை தவறாகப் பிரதிநிதித்துவப்படுத்தி, அமெரிக்கத் தடைகளை மீறி நிதி அமைப்பின் மூலம் டாலர்களைப் பரிமாற்றம் செய்ததாக 2018-இல் இந்த வழக்கு தொடங்கியது. பின்னர் இதில் ‘ராக்கெட்டீரிங்’ குற்றச்சாட்டுகளும் சேர்க்கப்பட்டன.
2018-இல் கைது செய்யப்பட்ட ஹவாயின் தலைமை நிதி அதிகாரி மெங் வான்சோ, 2021-இல் விடுவிக்கப்பட்டார். 2022-இல் அவர் மீதான குற்றச்சாட்டுகள் தள்ளுபடி செய்யப்பட்ட போதிலும், அவர் அளித்த ஒப்புதல் வாக்குமூலங்கள் இந்த விசாரணையில் சான்றுகளாகச் சமர்ப்பிக்கப்படவுள்ளன.
மூன்று மாதங்கள் வரை நீடிக்கும் என எதிர்பார்க்கப்படும் இந்த விசாரணையில், ஹவாய் மீதான தடையற்ற போட்டி மற்றும் தடை மீறல் குற்றச்சாட்டுகள் விரிவாக ஆராயப்படவுள்ளன.
