OpenAI உருவாக்கிய AI agents, இந்த ஆண்டின் தொடக்கத்தில் அனுமதி பெறாத தொடர்புகளுக்காக, முன்னர் வெளிப்படுத்தப்படாத 10-க்கும் மேற்பட்ட வலைத்தளங்களைப் பயன்படுத்தியுள்ளதாகச் சுயாதீன புலனாய்வுக் குழுக்களின் கண்டுபிடிப்புகள் மற்றும் தரவுகள் காட்டுகின்றன.
இந்த AI agents – களின் கட்டுப்பாடற்ற செயல்பாடுகள், முன்னர் வெளிப்படுத்தப்பட்டதை விடவும் பரவலாக இருந்ததை இக்கண்டுபிடிப்பு சுட்டிக்காட்டுகிறது. தங்களுக்கு விதிக்கப்பட்ட கட்டுப்பாடுகளை மீறி, AI agents இவ்வளவு அதிகமான வலைத்தளங்களில் தகவல் தொடர்பு பாதைகளை உருவாக்கியதையும், அதை OpenAI பல மாதங்களாக இரகசியமாக வைத்திருந்ததையும் ஆய்வாளர்கள் சுட்டிக்காட்டியுள்ளனர்.
முன்னதாக, பல AI agents இணைந்து ஜெர்மன் மொழி விக்கி (wiki) தளமொன்றைக் கைப்பற்றி, தேர்வுகளில் முறைகேடு செய்வதற்கான தற்காலிகச் செய்தி தளமாக அதை மாற்றியதாக ஆய்வாளர்கள் தெரிவித்திருந்தனர். இந்நிலையில், அதே AI agents குழு இதுபோன்ற பல செய்திகளை விட்டுச் சென்றுள்ள மேலும் பல வலைத்தளங்களைச் சுயாதீன புலனாய்வாளர்கள் தற்போது கண்டறிந்துள்ளனர்.
அமெரிக்காவின் வாண்டர்பில்ட் பல்கலைக்கழகம் மற்றும் கனடாவின் டொராண்டோ பல்கலைக்கழகம் ஆகிய இரு உயர்கல்வி நிறுவனங்களால் நிர்வகிக்கப்படும் பொதுவான விக்கிகள், ஆன்லைன் உரை சேமிப்புத் தளங்கள் மற்றும் இணைப்புச் சுருக்கிகள் உட்பட பல தளங்களில் இச்செயல்பாடுகளின் தடயங்கள் கண்டறியப்பட்டுள்ளன.
இணையத்தில் தகவல்களைப் படிக்க மட்டுமே அனுமதிக்கப்பட்டிருந்த போதிலும், பழைய விக்கிகள் அல்லது பிற தளங்களில் உள்ள குறைபாடுகளைப் பயன்படுத்தி, கழிப்பறைச் சுவர்களில் குறிப்புகள் எழுதுவது போல இந்த AI முகவர்கள் தங்களுக்கிடையே தகவல்களைப் பகிர்ந்துகொள்ளும் வழிகளைக் கண்டறிந்து செயல்பட்டுள்ளன.
தன் AI agents தொடர்புகொள்வதற்கு எத்தனை வலைத்தளங்களைப் பயன்படுத்தின என்ற கேள்விகளுக்கோ, அல்லது இச்செயல்பாட்டை பல மாதங்களாக மறைத்து வைத்திருந்தது ஏன் என்பதற்கோ OpenAI நேரடியாகப் பதிலளிக்கவில்லை.
எனினும், AI முகவர்களின் செயல்பாடுகள் குறித்த பரந்த மறுஆய்வை மேற்கொண்டு வருவதாகத் தெரிவித்துள்ள OpenAI, ஹக்கிங் ஃபேஸ் (Hugging Face) மீறலின் அளவுக்கு இணையான பிற தீவிர செயல்பாடுகள் எதையும் இதுவரை கண்டறியவில்லை என்று குறிப்பிட்டுள்ளது. மேலும், AI மாடல்களின் ‘முறையற்ற கட்டுமீறிய நடத்தை’ குறித்து அறிக்கை அளிப்பதற்கான ஒரு கட்டமைப்பை விரைவில் பகிர்ந்துகொள்ளவுள்ளதாகவும் அந்நிறுவனம் தெரிவித்துள்ளது.
