பிரபல இயக்குநர் ஜீத்து ஜோசப்பின் கதையில், இயக்குநர் ஆர். மாதேஷ் திரைக்கதை மற்றும் வசனம் எழுதி இயக்கியுள்ள ‘சண்டக்காரி’ திரைப்படம் விரைவில் திரையரங்குகளில் வெளியாகவுள்ளது.
லண்டனில் இயங்கி வரும் முன்னணி சாப்ட்வேர் நிறுவனத்தை பின்னணியாகக் கொண்டு உருவாகியுள்ள இத்திரைப்படத்தில், நிறுவனத்தின் உயர் அதிகாரியாக நடிகை ஸ்ரேயாவும், அதே நிறுவனத்தில் பணிபுரியும் ஊழியராக நடிகர் விமலும் நடித்துள்ளனர்.
எதிரெதிர் துருவங்களாக இருக்கும் இருவருக்கும் இடையே உருவாகும் காதல், கோபம், ஈகோ மற்றும் மோதல்களை மையமாகக் கொண்டு முழுமையான குடும்பக் நகைச்சுவைத் திரைப்படமாக இது உருவாக்கப்பட்டுள்ளது.
இப்படத்தின் முக்கிய நகைச்சுவை அம்சமாக, விமல் மற்றும் ஸ்ரேயா இடையேயான சண்டையில் சிக்கித் தவிக்கும் கதாபாத்திரத்தில் நடிகர் சத்யன் நடித்துள்ளார்.
மேலும், நீண்ட இடைவெளிக்குப் பிறகு மூத்த நடிகை கே.ஆர்.விஜயா மற்றும் புன்னகை பூ கீதா ஆகியோர் முக்கியக் கதாபாத்திரங்களில் நடித்துள்ளனர்.
இவர்களுடன் பிரபு, ரேகா, தேவ் கில், கிரேன் மனோகர் உள்ளிட்ட பல நட்சத்திரங்கள் இணைந்து நடித்துள்ளனர்.
அம்ரீஷ் இசையமைப்பில், குருதேவ் ஒளிப்பதிவில் உருவாகியுள்ள இத்திரைப்படம் குடும்பத்துடன் ரசிக்கும்படியான முழுமையான பொழுதுபோக்கு விருந்தாக அமையும் என படக்குழுவினர் நம்பிக்கை தெரிவித்துள்ளனர்.
