மத்திய ஆப்பிரிக்கக் குடியரசின் மேற்குப் பகுதியில் அமைந்த நானா-மாம்பெரே மாகாணத்திற்குட்பட்ட அப்பா (Abba) பகுதியில் செயல்பட்டு வந்த பாரம்பரிய தங்கச் சுரங்கம் ஒன்று எதிர்பாராதவிதமாக இடிந்து விழுந்து பெரும் விபத்துக்குள்ளாகியுள்ளது.
இக்கோர விபத்தில் சுரங்கத்தினுள் பணியில் ஈடுபட்டிருந்த 30-க்கும் மேற்பட்ட தொழிலாளர்கள் சம்பவ இடத்திலேயே உயிரிழந்தனர்.
மேலும், பலர் இடிபாடுகளுக்குள் சிக்கியிருக்கலாம் என அஞ்சப்படுவதால் பலி எண்ணிக்கை மேலும் உயரும் என எதிர்பார்க்கப்படுகிறது.
சம்பவம் குறித்துத் தகவலறிந்து விரைந்த உள்ளூர் மீட்புக் குழுவினரும் அப்பகுதி மக்களும் இணைந்து மீட்புப் பணிகளில் தீவிரமாக ஈடுபட்டு வருகின்றனர்.
படுகுழியாக மாறியுள்ள சுரங்கத்திலிருந்து இதுவரை 30 பேரின் உடல்கள் மீட்கப்பட்டுள்ளன. படுகாயமடைந்த பல தொழிலாளர்கள் மீட்கப்பட்டு, சிகிச்சைக்காக அருகிலுள்ள மருத்துவமனைகளில் அனுமதிக்கப்பட்டுள்ளனர்.
இடிபாடுகளுக்குள் சிக்கியவர்களை உயிருடன் மீட்பதற்கான சாத்தியக்கூறுகள் நேரமாக ஆகக் குறைந்து கொண்டே வருவதாக சம்பவ இடத்தில் இருக்கும் நேரில் கண்ட சாட்சிகள் வேதனை தெரிவித்துள்ளனர்.
சம்பவ இடத்திலிருந்து வெளியான காணொளிகளில், சேறும் சகதியுமாக உள்ள சுரங்கப் பள்ளத்திலிருந்து உடல்களை மீட்கும் அவல நிலையும், கவலையோடு கூச்சலிடும் தொழிலாளர்களின் பதற்றமான சூழலும் பதிவாகியுள்ளன.
இவ்விபத்து குறித்துப் பேசிய அந்நாட்டின் அரசு செய்தித் தொடர்பாளர் எவரிஸ்ட் என்கமானா, உயிரிழந்தவர்களின் குடும்பத்தினருக்குத் தனது ஆழ்ந்த இரங்கலைத் தெரிவித்துள்ளார்.
மேலும், பாதிக்கப்பட்ட குடும்பங்களுக்குத் தேவையான அனைத்து நிவாரண உதவிகளையும் அரசு உடனடியாக வழங்கும் என உறுதியளித்துள்ளார்.
மத்திய ஆப்பிரிக்கக் குடியரசில் நிலவும் வறுமை காரணமாக, ஆயிரக்கணக்கான மக்கள் எவ்வித நவீனப் பாதுகாப்பு உபகரணங்களும் இன்றி இத்தகைய பாரம்பரிய சிறு அளவிலான சுரங்கப் பணிகளில் ஈடுபட்டு வருகின்றனர்.
போதுமான பாதுகாப்பு வழிகாட்டுதல்கள் பின்பற்றப்படாததாலும், போதிய உள்கட்டமைப்பு வசதிகள் இல்லாததாலும் இங்கு இதுபோன்ற ஆபத்தான விபத்துகள் ஏற்படுவதாக செய்திகள் தெரிவிக்கின்றன.
