கியூபெக் மாகாணத்திலுள்ள ரெபென்டிக்னி (Repentigny) நகரின் குடியிருப்புப் பகுதிக்கு மிக அருகில் நிகழ்ந்த பாரிய ரயில் விபத்தைத் தொடர்ந்து, நகர்ப்புறங்களில் பயணிக்கும் சரக்கு ரயில்களின் வேக வரம்பை நிரந்தரமாகக் குறைக்குமாறு, கோரிக்கை முன்வைக்கப்பட்டுள்ளது.
ரெபென்டிக்னி நகர சபை இந்த கோரிக்கையை, மத்திய போக்குவரத்து அமைச்சிடம் (Transport Canada) உத்தியோகபூர்வமாக விடுத்துள்ளது.
இம்மாத ஆரம்பத்தில், ரெபென்டிக்னி நகரின் மக்கள் நடமாட்டம் மிகுந்த குடியிருப்புப் பகுதியில் பயணித்த சரக்கு ரயில் ஒன்றின் 46 பெட்டிகள், திடீரென தண்டவாளத்தை விட்டு விலகி (derailment) வீடுகளுக்கு மிக அருகில் சரிந்து விழுந்து விபத்துக்குள்ளாகின.
நல்வாய்ப்பாக இவ்விபத்தில் எவருக்கும் காயங்களோ அல்லது ஆபத்தான இரசாயனக் கசிவுகளோ ஏற்படவில்லை என்ற போதிலும், குடியிருப்பு வாசிகள் மத்தியில் இது பெரும் பீதியையும் பாதுகாப்பு அச்சத்தையும் ஏற்படுத்தியுள்ளது.
இந்த விபத்து ஏற்படுத்திய அதிர்வலைகளைத் தொடர்ந்து, ரெபென்டிக்னி நகர சபை அவசரமாகக் கூடி, ஒரு முக்கிய தீர்மானத்தை ஒருமனதாக நிறைவேற்றியுள்ளது.
அதிக மக்கள் தொகை கொண்ட நகர்ப்புறங்களில் பயணிக்கும் ரயில்களுக்கான தற்போதைய வேக வரம்புகளை மத்திய போக்குவரத்து அமைச்சு மறுபரிசீலனை செய்ய வேண்டும் என்ற கோரிக்கை, அந்தத் தீர்மானத்தின் பிரதான பகுதியாக விளங்குகின்றது.
