கியூபெக் மாகாண அரசு மற்றும் அரசிற்குச் சொந்தமான ‘ஹைட்ரோ- கியூபெக்’ (Hydro-Québec) மின்சார நிறுவனம் ஆகியன இணைந்து, பூர்வகுடி மக்களின் பாரம்பரிய நிலப்பகுதிகளில் புதிய நீர்மின் உற்பத்தித் திட்டங்களை முன்னெடுப்பதற்காக முன்மொழிந்த 2.5 பில்லியன் டொலர் மதிப்பிலான ஒப்பந்தத்தை, பெஸாமிட் (Pessamit) பிராந்தியத்தின் ‘இன்னு’ (Innu) பூர்வகுடி மக்கள் பொது வாக்கெடுப்பின் மூலம் நிராகரித்துள்ளனர்.
கியூபெக் நகரின் வடகிழக்கே அமைந்துள்ள பெஸாமிட் இன்னு பூர்வகுடி சமூகத்தைச் சேர்ந்த மக்கள் மத்தியில், இந்த ஒப்பந்தம் தொடர்பாக ஒரு பொது வாக்கெடுப்பு நடத்தப்பட்டது. இந்த வாக்கெடுப்பில் ஒட்டுமொத்தமாக 1,287 மக்கள் தங்களது வாக்குகளைப் பதிவு செய்திருந்தனர்.
வாக்குகள் எண்ணப்பட்டு, சமூக வலைத்தளங்கள் வாயிலாக நேரலையாக முடிவுகள் அறிவிக்கப்பட்ட போது, 63 சதவீதத்திற்கும் அதிகமான பெரும்பான்மை வாக்குகள் ஒப்பந்தத்திற்கு எதிராகப் பதிவாகி இருந்தமை கண்டறியப்பட்டது.
இதனையடுத்து, புதிய நீர்மின் உற்பத்தித் திட்டம் அந்த பூர்வகுடி மக்களால் முற்றாக நிராகரிக்கப்பட்டமை உறுதி செய்யப்பட்டது. “ஆஷ்காட் ஒப்பந்தம்” (Aishkat Agreement) அல்லது “ஆற்றல் மேம்பாட்டிற்கான புதிய உறவு உடன்படிக்கை” என அழைக்கப்பட்ட இந்த 42 பக்கங்களைக் கொண்ட ஆவணத்தின்படி, சுமார் 4,000 மக்கள் வாழும் இந்த பூர்வகுடி சமூகத்திற்கு அடுத்த 50 ஆண்டுகளில் 2.535 பில்லியன் டாலர்களுக்கும் அதிகமான இழப்பீட்டுத் தொகையை வழங்குவதற்கு, கியூபெக் மாகாண அரசும் ‘ஹைட்ரோ-கியூபெக்’ மின் நிறுவனமும்
ஒப்புக்கொண்டிருந்தன.
ஆயினும், இந்த ஒப்பந்தத்தில் உள்ள சில குறிப்பிட்ட சரத்துகள் பூர்வகுடி மக்களிடையே கடுமையான அதிருப்தியையும் சர்ச்சையையும் தோற்றுவித்திருந்தன.
வாக்கெடுப்பின் முடிவுகள் வெளியான பின்னர், ஊடகங்களுக்குக் கருத்துத் தெரிவித்த பொது வாக்கெடுப்புக் குழுவின் தலைவர் அலெக்சிஸ் வாவனோலோத் (Alexis Wawanoloath), “பெஸாமிட் இன்னு மக்கள் தங்களது தெளிவான தீர்ப்பை வழங்கியுள்ளதாகவும் இந்த ஒப்பந்தத்தில்
கையெழுத்திடுவதற்குத் தங்களது இனக்குழுத் தலைவர் ரெனே சிமோனுக்கு (Chief René Simon) அவர்கள் அனுமதி வழங்கவில்லை எனவும் இங்கு மக்களாட்சியே வென்றுள்ளது” எனவும் கூறியுள்ளார்.
பெஸாமிட் பூர்வகுடி மக்களின் பாரம்பரிய நிலப்பரப்பானது சுமார் 16 மின் உற்பத்தி நிலையங்களையும், 13 அணைகளையும் கொண்ட ஒரு பரந்த நீர்நிலைப் பிராந்தியம் என்பது சுட்டிக்காட்டத் தக்கது.
